Madaxweyne Xasan Sheekh oo u baxay safar dibadeed oo dalal dhowr ah uu ku tegayo

Visits: 77
(Rating 0.0/5 Stars) Total Votes: 0
1 0
Share via Social Media

Madaxweyne Xasan Sheekh oo u baxay safar dibadeed oo dalal dhowr ah uu ku tegayo

.

Share

Madaxweynaha Jamhuuriyadda Federaalka Soomaaliya, Xasan Sheekh Maxamuud iyo wafdi uu hoggaaminayo ayaa gelinkii dambe ee maanta gaaray magaalada Belgrade ee dalka Serbia, halkaas oo si diiran ugu soo dhoweeyeen mas’uuliyiin sare oo ka tirsan dowladda Serbia.

Madaxweynaha ayaa inta uu ku sugan yahay dalka Serbia waxa uu kulamo la qaadan doona madaxda dalkaasi, waxaana ugu muhiimsan kulan uu la qaadan doono dhiggiisa Serbia, Aleksandar Vučić.

Labada Madaxweyne ayaa ka wada-hadli doona xoojinta xiriirka iyo iskaashiga Soomaaliya iyo Serbia, gaar ahaan dhinacyada siyaasadda iyo danaha laba geesoodka ah ee labada dal.

Sidoo kale, Madaxweynaha ayaa qayb ka ah madax ka socota dowlaha caalamka, kuwaasi oo lagu casuumay ka qayb-galka shirka heerka sare ah ee lagu xusayo 65-guurada shirkii koowaad ee dhaq-dhaqaaqa dalalka aan isbahaysiga ahayn (Non-Aligned Movement), kaasi oo lagu qabtay magaalada Belgrade sannadkii 1961-kii.

Shirka ayaa waxaa ka qeyb-galaya madax iyo mas’uuliyiin ka socda dowlado kala duwan oo caalamka ah, iyadoo diiradda lagu saarayo xoojinta iskaashiga iyo mabaadi’da dhaqdhaqaaqa dalalka aan isbahaysiga ahayn.

Booqashada Madaxweyne Xasan Sheekh ee Serbia ayaa qeyb ka ah safar uu ku marayo qaar ka mid ah dalalka Yurub, iyadoo Seerbiya ay tahay halka uu ka bilaabanayo safarkiisa.

Madaxweynaha Soomaaliya ayaa inta uu ku sugan yahay Yurub la filayaa inuu yeesho kulamo kale oo uu kula qaato madax iyo mas’uuliyiin caalami ah, iyadoo safarkiisu uu ku soo beegmayo xilli dowladda Soomaaliya ay waddo dadaallo lagu xoojinayo xiriirka diblomaasiyadeed iyo iskaashiga caalamiga ah.