Trump ayaa qoraalkiisa ku yiri: "Hoggaanka Iiraan wuxuu leeyahay laba waji oo aan la rumaysan karin. Waxay codsadaan kulammo, wada-hadalladna way bilowdeen, waxaana sidoo kale la qorsheeyay kulammo kale oo dhici doona mustaqbalka dhow. Laakiin haddana si cad ayay u sheegaan in aanay wax wada-hadal ah jirin, isla markaana ay wada-xaajood la leeyihiin oo keliya Cummaan.”

Trump waxa kale oo ku eedeeyay Iiraan inay mar kale ku celinayso hadalkeedii caadiga ahaa, iyadoo sheegaysa inay si awood leh u maamuli doonto Marinka Hormuz, inkastoo uu sheegay in marinku uu si buuxda gacanta ugu jiro Ciidanka Badda ee Maraykanka iyo go’doomintooda.

Wuxuu intaas ku daray: "Waxba ma gaaraan Iiraan ilaa aan annagu oggolaanno, waxbana ma gaari doonaan ilaa heshiis la gaaro. Haddii Iiraan ay qirato ama ay diiddo, xaqiiqadu waa inaan ka wada hadlayno xallinta dhibaato ay iyagu abuureen tobannaan sano ka hor.”

Trump ayaa qoraalkiisa ku soo gabagabeeyay: "Arrintu waa mid aad u fudud: Iiraan waligeed ma yeelan doonto hub nukliyeer.”