Dhageysi maxkamadeed ayay garsoorayaashu ku amreen in Maxamed Cumar oo 32 jir ah, kana soo jeeda magaalada Roseville ee Minnesota, uu xabsiga ku sii jiro inta dacwaddiisu socoto.

Maxamed iyo nin ay wada shaqeynayeen oo lagu magacaabo Ibraahim Cabdi ayaa lagu eedeeyay inay si khiyaano ah uga qaateen $3.2 milyan barnaamijka Housing and Stabilization Services (HSS), iyagoo sheegay in lacagtaasi loogu adeegayay laba xarumood oo caafimaad oo ku yaalla magaalooyinka Twin Cities.

Xeer ilaalintu waxay sheegtay in muddo afar bilood ah sanadkii 2023, labada nin ay dalbanayeen lacago adeegyo loo qabtay qof horey u dhintay.

Masuuliyiinta Maraykanka ayaa si gaar ah u xusay Maxamed Cumar markii dacwadaha la shaacinayay. FBI-da ayaa sheegtay inuu ka booday balakoon dabaqa afraad ah si uu uga baxsado xarigga, balse saacado kadib ayaa la qabtay. Wuxuu ku soo muuqday maxkamadda isagoo saaran kursiga curyaamiinta, halka qareenkiisu sheegay inuu lug ka jabay.

Qareenka Maxamed Cumar ayaa codsaday in lagu sii daayo dammaanad shuruudo leh, balse xeer ilaalinta federaalka ayaa sheegtay inay ka cabsi qabaan inuu dalka ka baxsado xitaa haddii qalabka GPS-ka lagu xiro, iyagoo tilmaamay eedeymo sheegaya inuu lacago loogu talo galay carruurta Autisimkanka ku iibsaday hanti taalla Kenya.

Toddobaadkii hore ayuu maxkamadda kasoo muuqday, waxaana markaas lagu amray inuu xabsiga sii joogo ilaa dhageysiga Arbacada dambe.

Sida ay sheegeen masuuliyiinta federaalka, qorshaha musuqmaasuqa ee lagu lunsaday $90 milyan oo Maxamed Cumar lagu eedeeyay inuu qayb ka ahaa wuxuu ku lug lahaa toddobo barnaamij oo Medicaid ah oo ay maamusho dowladda gobolka. Barnaamijkaas ayaa la joojiyay sanadkii hore kadib markii la sheegay in si weyn loogu sameeyay musuqmaasuq.

Tan iyo markii uu billowday xilliga labaad ee madaxweyne Donald Trump, maamulkiisa ayaa musuqmaasuqa sabab uga dhigay dib u dhigista boqolaal milyan oo dollar oo maalgelinta Medicaid federaalka ah oo la siin jiray gobolka Minnesota.