Laakiin maanta cid walba ayaa u bareeri karta kooxda gacan iyo af miday noqotaba. Si fudud taasi kuma imaan, geesiyaal badan ayaa godka ugu jira, umad walba oo maanta sharaf ku nool kuwa ayaa u dhintay neecawd ay haystaan.

Waxa laga yaaba in aad isweydiinayso maxay sidan deg-degta ah ugu jabtay Al-Shabaab.

Marka laga tago dhiiga ay hurayaan ciidanka qalabka sida ee dowladda Soomaaliya oo kooxda la dagaalamayay waqti dheer, haddana waxa jira dhowr arrimood oo qeyb muhiim ah ka qaatay waxyaabaha soo dadajiyay jabka kooxda Al-Shabaab

Maanta waxa aynu soo qaadaneyna dagaalka dhaqaalaha iyo sida u saameeyay kooxda.

Al-Shabaab waxay bil walba heli jireen malaayiin dollar, lacagta ugu badan waxay ka qaadi jireen ganacsatada magaalada Muqdisho, lacagtaas waxay bil walba ku dili jireen dad shacab ah oo ganacsi iyo cibaado ku jira.

Hadda xoog iyo xeeladba xoola siinta Al-Shabaab waa xaaraan, kuma fududa maanta in aad baad siiso Al-Shabaab xitaa haddii cabsi darteed u bixin laheyd.

Akoonadii kooxda Al-Shabaab lacagaha loogu shubi jiray waa la xiray, telefoonadii dadka soo wici jiray ee baada weydiin jiray hawada ayaa laga saaray, goobihii ay dadka ugu yeeri jireen waa la burburiyay, cadadka lacagaha jeebka lagu qaato xiliga duulimaadyada gudaha dalka waa la xadiday.

Dadkii amarka dowladda kadib lacagaha la wadaagay Al-Shabaab, badankood waa xiran yihiin xataa dilaalintii dhulalka lacag uma gudbiyaan Al-Shabaab oo taasi waa xabsi dooro.

Dad aan badneyn oo laga yaabo inay weli dhuumasho lacag ku siiyaan Al-Shabaab ayaa sidoo kale hay’addaha amniga ku daba-jiraan sida aan xogta ku helnay.

Arrimahan oo la isku geeyay ayaa wiiqay dhaqaalihii kooxda, taasina waxay wiiqday tabartii kooxda oo aan hadda hub dibada kasoo iibsan karin, ciidan cusub qoran karin, mushaarna u haynin kuwii hore ula jooga, sidoo kale daawo uma hayaan dhaawacyadooda sida ay xogaha sheegayaan.

Maalintii go’aanka laga soo saaray lacagaha la siiyo Al-Shabaab wixii ka dambeeyay qofkii lacag siiyay waxaa loo nisbeyn karaa inuu kooxda ku fikir yahay ayay leeyihiin kooxaha amniga ah ee dowladda federaalka.

In jiritaanka kooxda Al-Shabaab uu soo gaaray dhowr iyo toban sano waxaa loo sababeeya dhaqaalaha ay bixinayeen dadka degan gobolada Koonfureed ee Soomaaliya, gaar ahaan magaalada caasimada ah ee Muqdisho.

Dagaalka dhaqaalaha waxaa loo arka mid kamid ah waxyaabaha soo dadajiyay jabka Al-Shabaab.

In dagaalka dhaqaalaha lasii wado, dadka weli dhuumashada lacagaha ku bixinayana gacanta lagu soo dhigo, oo shacabka Soomaaliyeed si weyn ugu midoobaan mowduucan wuxuu soo dadajin doona soo afjarida kooxda.

Al-Shabaab dood la’aan waa dhibaatada ugu weyn ee Soomaaliya taalla maanta, laakiin sanado badan kadib waxaa muuqata fursadii lagu soo afjari lahaa dhibaatadaas.

XIGASHO:-CASIMADDA.NET