Ka dib markii ay caweynayeen habeenkii oo dhan, Real Madrid ayaa u dabaaldegtay hanashadooda taariikhiga ee Champions League iyagoo bas dusha ka furan ku soo maray wadooyinka Madrid.

Kooxda Zinedine Zidane ayaa ka soo duulay Milano ka dib markii ay rigoore kaga badiyeen kooxda ay deriska yihiin ee Atletico Madrid, waqtina kuma dhuminin inay bas dusha ka furan koraan oo ay koobka kula dabaaldegaaan kumanaan kun taageerayaal ah oo isagu soo baxay wadooyinka caasimada Spain.

Real ayaa ku guuleysatay koobkeedii 11aad ee Champions League ka dib rigoorayaal 5-3 ah oo ay ku garaacday Atletico iyadoo ciyaar xiiso badan ay ka dhacday xalayto garoonka San Siro.

Cristiano Ronaldo ayaa dhaliyay rigoorada guusha ka dib markii labada kooxood ay ku kala bixi waayeen barbaro 1-1 ah 120 daqiiqo oo ay ku ciyaareen Milan.

Sergio Ramos ayaa u dhiibay hogaanka Real Madrid ka dib daqiiqadii 15aad iyadoo kooxda Bernabeu ay u muuqaya qeybtii hore kooxda xoogan.

 

Bedelkii uu Diego Simeone ku soo geliyay Yannick Carrasco ayaana muhim noqday iyadoo xiddiga reer Belgium uu dhaliyay goolka barbaraha iyadoo 11 daqiiqo ay ka harsan tahay waqtiga caadiga ah, waxaana ay keentay in ciyaarta lagu darro 30 daqiiqo oo dheeri ah.

Iyadoo labada kooxood ay u muuqdeen kuwa daalay, waxaa lagu kala baxay rigoore, Juanfran ayaana noqday ninka uu qalbijabka ku dhacay markii uu kooxdiisa rigoore ka qasaariyay ka hor inta uusan Ronaldo xaqiijinin ku guuleysiga koobkiisii 3aad ee Champions League.