Saleebaan C/laahi oo ahaa 20 jir mehrad ganacsi ku haystay xeendaabka Xarunta Visa Trafico, ayaa ka mid noqday lixda qof ee weerarkaasi ku dhimatay oo saddex ka midda ay yihiin Ciidankii Taraafikada, halka labada kalana lagu sheegay raggii weerarka soo qaaday (Nin la socday gaarigii qaraxa loo adeegsaday iyo nin kale oo toogasho ay ku dileen Ciidanka Taraafikada).

Xuseen Ibraahim Macalin oo ka mid ah ehelada Saleebaan C/laahi, ayaa wuxuu sheegay inay goobtaasi ka qaadeen agabyadii uu ku iibinaayay Saleebaan.

15 qof oo ku dhaawacantay qaraxaasi, ayaa waxay u badan yihiin dadkii mehradaha ku haystay xeendaabka Xarunta Visa Trafico, sida uu xaqiijiyay Taliyaha Ciidanka Booliska Gobolka Banaadir, General Cali Xersi Barre (Cali Gaab).

Mintidiinta Ururka Al Shabaab oo sheegtay masuuliyadda weerarkan, ayaa waxay horay u soo saareen digniino la xiriira inay dadku isaga fogaadaan Xarumaha Dowladda Somaliya iyo Amisom.

Xarunta Visa Trafico, ayaa waxay qabataa shaqada hubinta sharciyada gaadiidka iyo wadayaashooda, waxaana si ku meel gaar ihi loogu hayaa amaba loogu xiraa dadka hareer mara sharciyada wadooyinka.

Weerarada ka dhacaaya Magaalada Muqdisho, ayaa waxay noqdeen kuwo lagu ilaawo weerarba weerarka kale ee ka dambeeya. Sida caadada ahna ma jirto cid loo soo qabto weerarada kuwooda abaabulan.