Maxkamadda Ciidamada Qalabka Sida ee Somaliland ayaa Maanta oo Arbaco ah xukun dil toogasho ah ku fulisay Afar Askari oo ka kala tirsanaa Ciidamada kala duwan Somaliland, kuwaasi oo horey Maxkamadda xukuno ugu riday.

Askarta dilka toogashada lagu fuliyey ayaa horey deegaano ka tirsan Somaliland dilal ugu geystay dad shacab ah, iyagoona markii la soo qabtay Askarta falalka geysatay, la horgeeyay Maxkamadda oo xukuno ku riday, Maantana lagu fuliyey xukunkaas.

Sidoo kale tiirka loogu tala-galay inuu ka dhaco xukunka dilka toogashada ayaa waxaa Maanta laga furay laba Nin kale oo horey Maxkamadda Somaliland xukuno dil toogasho ugu riday, isla markaana la qorsheeyay raggaas in la toogto.

Labadan nin ayaa waxaa uu mid kamid ahaa Rag Burcad-badeed ah oo mar isku dayay inay Xabsiga Magaalada Hargeysa ay ka baxsadaan.

Koonfurta Soomaaliya ayuu ka soo jeeda Ninka Burcad-badeedka ka tirsanaa, waxaana uu toogtay Askari ka tirsan Ciidamada Asluubta oo ilaalinayay Xabsiga Hargeysa. Qofka labaad ee maanta tiirka laga furay ayaa isna ahaa Askari ka tirsan Ciidamada Somaliland kaas oo hore nin ay qaraabo yihiin ku dilay Magaalada Laascaanood.