Ka dib muddo billo ah oo ay cakirneyd sidii lagu soo dhisi lahaa Maamulka loo wado in loo dhiso Gobolada Shabellaha Dhexe & Hiiraan, ayaa waxaa la leeyahay waxay keentay inuu Faarax Sheekh C/qaadir ka tanaasulo damaciisii.

Ilo wareedyo, ayaa Dhacdo.com u sheegay Faarax Sheekh C/qaadir in uu gacan ka taagay xilkaasi, isla-markaana uu Madaxweynaha Somaliya ku wargeliyay inuu ka tanaasulay yoolkiisii ku aadanaa Goboladaasi.

Madaxweyne Xasan Sheekh Maxamuud, ayaa wuxuu hadda qorsheynayaa in Gudoomiyaha Jaamacadda Simad, Daahir Xasan Cabdi (Daahir Carab) uu ku bedelo booska Faarax Sheekh C/qaadir. Daahir Carab waa nin ku dhow Hogaamiyaha Wadanka.

Haddii Madaxweyne Xasan Sheekh Maxamuud uu ku soo baxo doorashada madaxtinimada ee sanadkan lagu wado inay dalka ka qabsoomto, ayaa waxaa Faarax Sheekh lagu soo dari doonnaa Golaha Wasiirada.

Faarax wuxuu dadaal u geli doonnaa sidii uu markale uu Madaxweyne Xasan ugu soo bixi lahaa doorashada dalka, iyadoo la xusuusan yahay in Faarax uu yahay ninkii Xasan Sheekh ka caawiyay inuu ku guuleysto tartankii doorashada madaxtinimada dalka ee September 10, 2012 ka dhacday Magaalada Muqdisho.

xigasho:-dhacdo.com