"Isbitaalada Banaadir xalay fiidkii waxaa qabsaday dab, qeybtii bakhaarada keydka daawada caruurta, dalkeena isbitaalada waa ku yar yihiin, sidoo kale waxaa bas beelay Isbitaal Madiina qeybtii saalada qaliinka”ayuu yiri Guddoomiyaha Gobolka Banaadir.

Waxaa uu sheegay in su’aal badan la iska weydiiynayo waxa isku soo aadiyay in labada Isbitaal xalay uu dab ka kaco, waxaana uu xusay in baaritaan lagu sameynayo.

"Su’aal badan ayaa la iska weydiinayaa waxa isku soo aadiyay in xalay labada isbitaal uu dab ka kaco, Wasaaradda Caafimaadka iyo hey’adaha amniga oo shaqo ka wada dhaxeyso ayaa wax iska weydiin doono”ayuu yiri Guddoomiyaha Gobolka Banaadir.

Agaasimaha Isbitaalka Madiina Dr. Maxamed Yuusuf ayaa sheegay in dabkii xalay ka kacay qeybta saalada qaliinka isbitaalka uu gebi ahaanba baabi’iyay wixii qalab ee looga qeyb qaadanayay qaliinada, isagoo xusay in la joojiyay howlihii qaliinka ee Isbitaalka u yaalay maanta oo isniin ah.

Sidoo kale Agaasimaha Isbitaalka Banaadir ayaa sheegay in illaa 30 tan daawada caruurta oo ku jirtay Labo Bakhaar, waxaana uu xusay in isbitaalka maalin walba uu daawo siin jiray boqolaal caruur ah.

Dadka reer Muqdisho ayaa maanta hadal hayay dabka ka kacay xalay labada isbitaal ee Madiina iyo Banaadir, iyadoo aan wali si rasmi ah loo shaacin sababta dhalisay, balse looga shaki qabo inay tahay cilad dhanka korontada ah.