Jules Selwan oo ah madaxa dugsiga, isla markaasna macallin Duullimaad ka ah Dugsiga ayaa halkaas si diirran ugu soo dhaweeyey carruurtaas. Isagoo ugu horreyn halkaas ku siiyay carruuta warbixin guud oo la xiriirta dugsiga iyo tababarada duulimaadka.

Soo dhaweyn iyo warbixinta guud kaddib, Waxay carruurtii fursad u heleen in sharaxaad guud laga siiyo Duullimaadka, Gaar ahaan Dayaaradda ay ku duuli doonaan oo ah Cessna 172.

Carruurtan oo kala ahaa; Zaki Ananug, Ibrahim Omar, Ayuub Hassan, Ibrahim Gure iyo Wheliye Mohamuud ayaa markii ugu horreysay waxaa u suuro-gashay inay mid mid ula duulaan Macallin Jules muddo hal saac ah, ayagoo ka duulayey Garoonka CARP ee ku yaala galbeedka magaalada Ottawa.

Duullimaadkaas kaddib ayaa carruurtaas waxaa wajiyadooda la dheehan karay farxad iyo Rayn-rayn. "Maanta waa maalin aan waligeey xasuusnaan doono,” ayuu yiri mid ka ah caruurtaas. "Waa maalintii iigu horeysay ee aan dayaarad wado aniga oo kaalmo ka helay macalin Jules”

Macalin Jules ayaa wuxuu Waaliddiinta Soomaaliyeed ee Carruurtoodu xiiseyneyso inay bartaan duulimaadyada ugu baaqay inuu soo dhaweynayo Carruurta Xiisaha u qaba inay bartaan duuliyenimada, wuxuuna sheegay in dugsiga International Pilot Academy (IPA) uu xiriir toos ah la leeyahay Jaamacadda Carleton University ee magaalada Ottawa.