Guddiga u qaabilsan howlaha macalimiinta Kenya(TSC) ayaa la weydiistay in uu siiyo xubnihiisa mushaaraadka bisha September.

Xoghayaha guud ee ururka Knut Wilson Sossion ayaa sheegan in ururkiisu uusan ka laaban doonin codsigooda ah in la kordhiyo mushaaraadka macalimiinta boqolkiiba konton ama lixdan.

"Macalimiintu dib ayay u bilaabi doonaan shaqo joojinta kadib sagaashan maalmood haddii Guddiga macalimiinta,”ayuu yiri xoghayaha guud ee ururka Knut.Sidoo kale waxa uu codsaday in dib loo qaabeeyo jadwalka qaadista imtixaanaadka shahaadiga si macalimiintu ay u diyaariyaan ardaydooda.

Dhinaca kale Xoghayaha guud ee ururka Kuppet Akelo Misori ayaa ka codsaday Wasaarada Waxbarashada in ay dib u eegto taariiqda xilliyada waxbarashada si ay macalimiinta uga caawiyaan inay casharo muraajaco ah siiyaan ardayda.

Khamiistii aynu ka soo gudubnay ayaa Maxkamada dalka Kenya waxa ay ku amartay ururada macalimiinta inay ka noqdaan shaqo joojinta.

Xaakimka Maxkamada Shaqaalaha Nelson Abuodha ayaa sheegay in uu amray ururada macalimiinta inay ka laabtaan shaqo joojinta muddo sagaashan maalmood ah ayna bilaabaan wadahadal ay la galaan dowlada si loo xaliyo khilaafka.

Shaqo joojinta ay ku kaceen macalimiinta dalka Kenya ayaa ahayd tii ugu waqtiga dheereed muddo 58 sano ah, waxayna saameyn ku yeelatay boqolaal kun oo arday ah oo wax ka barata dugsiyada dalka Kenya.