Cali Dheere wuxuu tilmaamay inay halkaasi ku dileen ku dhawaad 100 Askari oo Kenyati ah oo qaarkood si toos ah loo toogtay halka qaarna ay ku baaba’een weerarkii Ismiidaaminta ahaa ee albaabka hore lagu galay.

Waxa uu hadalkiisa intaasi raaciyay Afhayeenka Shabaab ciidamada Mujaahidiinta Shabaab weerarkaasi inay si dhiiran u qaadeen, islamarkaana ay ku baabi’iyeen Kenyattiga ku sugnaa Saldhiga.

Wuxuu ku faanay inay halkaasi ka qaateen ku dhawaad 30 gaadiidka Dagaalka ah, hub iyo Agab Millaterina ay ka furteen ciidamada Kenya ee Saldhigaasi lagu weeraray.

Afhayeenka Guud ee Shabaab Sheekh Cali Dheere ayaa intaasi hadalkiisa ku daray in ciidamada Kenya ay ku beegsan doonaan meel kasta oo ay Somaliya ka joogaan, weerarkii Ceelcaddena uu qayb ka ahaa weeraro badan oo ciidanka Kenya loo qorsheeyay.

Isaga oo hadalka sii wata ayaa waxa uu fariin u diray Dowladda iyo shacabka Kenya oo uu u sheegay in Kenyan-ka aysan aqoonin dagaalka, islamarkaana ay ku halaagsamayaan dagaalka hadii aysan Somaliya ka bixin.

Ilaa hada waxaanan si rasmi ah loo cadeyn karin Tirada Askarta Kenyan-ka ah ee Shabaab ay ku dileen weerarkaasi, kasokoow Sheegashada Shabaabka ay sheeganayaan.

Dowladda Kenya waxa ay qiratay in Askar looga laayay weerarka ka dhacay Degmada Ceelcade, balse ma aysan faah-faahin tirada Askarta weerarkaasi looga dilay.

Xigasho:-Dhacdo.com