Ugu yaraan 50 qof, ayaa waxaa la xaqiijiyay inay ku dhimatay weerarkan, halka tiro intaa ka badana ay ku dhaawacantay. Dadka dhaawacmay waxaa la dhigay goobaha caafimaadka.

Afhayeen u hadlay Wasaaradda Caafimaadka Xukuumadda uu fadhigeedu yahay Magaalada Tripoli, ayaa xaqiijiyay in ka badan 47 qof in ku dhimatay weerarkaasi, halka 100 kalana ay ku dhaawacantay.

Ma jirto illaa iyo hadda cid sheegatay masuuliyadda weerarkaasi, balse waxaa lagu tuhmayaa ururada xagjirka ah ee ka dhashay riditaankii Xukuumaddii uu hogaanka u haayay Col. Muammar Gaddafi.

Weerarkan wuxuu noqonayaa noociisii ugu khasaaraha badnaa ee ka dhaca dalkaasi, tan iyo markii xoog awoodda looga maquuniyay Madaxweynihii hore Libya, Muammar Gaddafi, sanadkii 2011-ka.