SHIRKA MAGAALADA KISMAAYO OO MAALINTII LABAAD GALAY Shirkan oo maanta galay maalinkii labaad ayaa waxaa lagu lafa guri doonaa dhawr arrimood oo ku qotoma xiriirka dowladda dhexe iyo dowlad goboleedyada, dib u dhiska ciidanka iyo qeybsiga qeyraadka.

Saraakiil ka tirsan Madaxtooyada maamulka Jubbaland ayaa waxa ay Idaacadda Risaala u sheegeen in xalay hoyga martida ee Kismaayo ay kulamo gaar gaar ah ku yeesheen Madaxda dowlad goboleedyada iyo Wakiilka QM oo weli ku sugan Kismaayo, waxayna ka wada hadleen arrimo ku saabsan xiriirka dowladda iyo dowlad goboleedyada.

Sidoo kale kale xalay waxaa magaalada Kismaayo kulamo ku yeeshay Wasiirada dowlad goboleedyada ka kala socda, waxayna ka arrinsadeen guddiyo midow ah oo Wasiirada ay sameysanayaan, si ay u xoojiyaan wada shaqyenta dhexdooda ah.

Wararka aan ka heleyno magaalada Kismaayo ayaa waxa ay sheegayaan in Madaxweynaha Puntland uu wareejin doono xilka Guddoomiyaha Golaha Iskaashiga dowlad goboleedyada, bacdamaa ay ku soo wajahan yihiin doorashooyin.

Kulankan oo berri la soo gaba gabeyn doono sida uu qorshaha yahay, Madaxdan lama oga waxyaabaha dhabta ah ee shirkoodan ay ka soo saari doonaan, laakiin sida looga bartay waxay soo saari doonaan warmurtiyeed ay ku cadeyn doonaan waxyaabaha ay isku fahmeen.

TALIYAHA CIIDANKA XOOGGA OO KORMEERAY TALISKA URURKA 60AAD EE ILAALADDA MADAXTOOYADDA

Taliyaha ciidanka xoogga dalka Somaliyed S/gaas Daahir Aadan Cilmi (Indhaqarshe) ayaa kormeeray taliska Ururka 60aad ee ciidanka Ilaaladda Madaxtooyada Qaranka, halkaasi oo ay ka socdaan tababaro Ciidanka aqoontooda kor loogu qaadayo.

Kusimaha Taliyaha Ururka 60aad, ahna Abaanduulaha Ururkaasi Dhamme Dayax Cabdi Cabdule, ayaa S/gaas (IndhAqarshe) uga xog waramay shaqada ay hayaan ciidanka iyo tababarada halkaasi ka socda.

Taliyaha Ciidanka Xoogga dalka, ayaa ciidanka Ururka 60aad ku boggaadiyey shaqada adag ee ay u hayaan, isaggoo Ciidanka kula dardaarmay inay tusaale lagu daydo u noqdan ciidanka Qaranka.

Kormeerka ka dib ayaa Taliyaha ciidanka xoogga dalka Soomaaliyeed, ayaa kulan gaar ah waxa uu la qaatay saraakiisha ciidanka ilaaladda Madaxtooyadda Somaliya, isagoona warbixin ka dhageystay saraakiisha.

MID KA MID AH GABDHIHII UGU HOREEYAY XULKA QARANKA KUBADDA KOLEYGA SOOMAALIYA OO GEERIYOOTAY

Alle ha u naxaristeen Saciido Nuur Abuukar [Saciido Wariiri] oo ka mid ah aheyd gabdhihii ugu horeeyay xulka Qaranka kubadda Koleyga Soomaaliya ayaa ku geeriyootay magaalada Toronto ee dalka Canada.

Saciido ayaa la sheegay in waayadii ugu danbeeyay ay la il darneyd xanuun soo wajahay oo ugu danbeyntii sababay in ay ugu geeriyooto Isbitaal ku yaala magaalada Toronto maalmihii aynu soo dhaafnayba ay ku jirtay.

Saciid ayaa u soo cayaartay xulkii kubadda Koleyga Soomaaliya, iyada oo ka qeybgashay cayaaro heer caalami ah, gaar ahaan tartankii Qaaradda Africa ee Kubadda Koleyga oo Toddobaatameeyadii lagu qabtay dalka Masar.

Dadkii yaqiinay ayaa ku si feeyay in ay aheyd qof cayaaraha iyo guud ahaanba Sportga siweyn u jecleyd, islamarkaana ay ku dayanjireen gabdhaha kale ee asaageedda ahaa.

SWEDEN CARUURTA KU NOOL XAAFADAHA SABOOLKA WAY KA CAYILAN YIHIIN CARUURTA KALE EE…..

Caruurta Ku Nool xaafadaha Saboolka ah Waxey ka Cayilan yihiin Ama ka buuran yihiin Caruurta ku Nool xaafadaha Hodonka ah Ama Qaniga Ah Ee.

Tusaale ahaan waa laban laab caruurta afar jirrada ah ee buuran ama culeyskoodu saa’idka yahay ee ku nool xaafadaha danyarta sida Skärholmen iyo Angered ee magaalooyinka Stockholm iyo Göteborg marka loo barbar dhigo xaafadaha Örgryte iyo Danderyd halkaas oo ay dadka deggani leeyihiin dhaqaale iyo aqoon ka sareysa kuwa ku nool xaafadaha Skärholmen iyo Angered.

Erik Hemmingsson waa cilmi baare wax ka baara buurnaanta:

Arrintani waa dhibaato salka ku heysa dabaqadda ilmuhu ka soo jeedo, ayuu yiri Erik Hemmingsson.

Waxaa kaloo la ogaaday in caruurta buuran ama culeyskoodu badan yahay ku badan yihiin degaanada miyiga marka la barbar dhigo magaalooyinka waaweyn sida ka muuqata warbixinta uu ururiyey daryeelka caafimaadka caruurta ee maamul gobaleedka Sörmland kaasoo is barbar dhigay culeyska afar jirrada ku nool dalka oo dhan.

Warbixintaa ayaa laga soo ururiyey maamul gobaleedyo tiradoodu tahay 19 ee ka mida 21 maamul gobaleedka dalku ka kooban yahay.

Sarah oo ku nool Södertälje ayaa ka mida caruurta caafimaad darada ku qabtay buurnaanta.

Caruurnimadeydi dhibaato ama waxa loogu yeero ”mobbning” ayaa la ii geysan jiray balse markaa ma ogeyn in dhibaatada iiga imaneysay buurnaanta, ayey tiri Sarah.

Gobalada Jämtland iyo Västernorrland ayey ku nool yihiin afar jirrada ugu badan ee culeyskoodu saa’idka yahay iyadoo boqolkiiba 16 caruurta halkaa ku nooli yihiin kuwo buuran ama culeyskoodu saa’idka yahay.

Dhanka kale Skåne ayey ku nool yihiin tirada ugu yar caruurta afar jirrada buuran ama culeyskoodu saa’idka yahay.

XIGASHO. RAADIYAHA SWEDEN

XUBNAHA GOLAHA DEGAANKA BOOSAASO OO LAGU DHAWAAQAY(AKHRISO MAGACYADOODA)

Waxaa goordhow magaalada Boosaaso looga dhawaaqay liiska xildhibaanada golaha degaanka degmada Boosaaso kuwaasoo ka kooban 31 xubnood.

Liiska xildhibaanada kamid noqonaya golaha deegaanka Boosaaso waxaa kasoo muuqday duqa kumeel gaarka ah ee Boosaaso ahna musharax u taagan duqa Boosaaso iyo musharaxiin kale oo u taagan qabashada gudoonka golaha degaanka degmada Boosaaso.

LIX RUUX OO ISUGU JIRA CIIDAN IYO SHACAB OO SHALAY LAGU DILEY MUQDISHO

Ugu yaraan lix ruux oo isugu jira askar iyodad rayid ah ayaa shalay siyaabo kala duwan loogu diley magaalada Muqdisho ee caasimada dalka Soomaaliya.

Rag hubeysan ayaa Waaxda Jamhuuriya ee degmada Kaaraan waxa ay gelinkii dambe ee shalay ku dileen afar askari oo ka tirsanaa ciidanka dowladda federaalka Soomaaliya.

Warar kala duwan ayaa ka soo baxaya sida ciidamadan lagu diley hase yeeshee sida ay u xaqiijiyeen saxaafada xubno ka tirsan maamulka degmada Kaaraan dilkan ayaa yimid kadib markii askartan rasaas lagu furay xilli ay saarnaayeen mooto bajaaj,iyaodo dilkana ay geysteen rag hubeysan oo watay gaari yar.

Raggii geystey falka dilka ah ayaa baxsaday iyadoo goobta uu ka dhacay dilka ay gaareen ciidamada ammaanka dowlada Federalka Soomaaliya iyagoo halkaa ay ka bilaabeen hawlgal amni xaqiijin ah.

Dhinaca kale labo ruux oo rayid ah ayaa lagu diley gelinkii hore ee shalay meel ku dhow jamacada SIMAD ee degmada Warta Nabada iyadoo dilkaasna ay geysteen dabley hubeysan oo watay Mooto.

Falalka dilalka ah ee loo geysto dadka rayid ah iyo ciidamada ayaan badankood la soo qaban cidii ka dambeysay iyadoo sidoo kale aysan hay’adaha ammaanka ka hadlin dilalkaas.

MADAXWEYNE XAAF OO SHEEGAY IN SHABAAB AY AFDUUBTEEN KU DHAWAAD 70 ODAY

Madaxweynaha maamulka Galmudug Axmed Ducaalle Geelle Xaaf oo Khudbad ka jeedinaayay Shirka Golaha Iskaashiga maamul goboleedyadda ee ka socda Magaalada Kismaayo ayaa ka hadlay arimo badan oo ku saabsan dagaalka AlShabaab.

Madaxweynaha waxaa uu sheegay in ku dhawaad 70 Oday Shabaab ay ka Afduubteen Shalayy degaano ka tirsan gobolka Galgaduud, islamarkaana ay la aadeen degmada Ceelbuur oo ay ku sugan yihiin Shabaab.

Xaaf waxaa uu tilmaamay in ay tahay nasiib daro weyn ee dowladda Soomaaliya ay ku mashquusho burburinta maamul goboleedyadda,iyadoo Shabaab ay dadka dhibaato ku hayaan.

Sidoo kale waxaa uu tilmaamay in ay tahay wax laga xumaado in dowladda Soomaaliya aysan Amniga dalka aysan Masuuliyad iska saarin.

Hadalka kasoo baxay Madaxweyne Xaaf waxaa uu kusoo beegmaya xilli maalmihii lasoo dhaafay AlShabaab ay dad Odayaal ah ay ka Afduubteen gobolka Galgaduud, islamarkaana ay la aadeen degaanada ay maamulaan.

WASIIRKA ARRIMAHA GUDAHA OO FURAY SHIRKA NABADEYNTA GAALKACYO

Wasiirka Wasaarada Arrimaha gudaha federaalka iyo dib u heshiisiinta ee Xukuumada Soomaaliya Cabdi Maxamed Sabriye ayaa shalay si rasmi ah Muqdisho kaga furay shir lagu dardar gelinayo arrimaha nabadeyna ee Magaalada Gaalkacyo.

Shirka waxaa ka qeyb galay xubno ka socda Wasaaradaha arrimaha gudaha ee maamulada Galmudug iyo Punland iyo sidoo kale sidoo kale hay’addaha ka shaqeeya arrimaha nabada iyo dib u heshiisiinta ee ka howlgala Soomaaliya.

Shirka waxaa soo qaban qaabisay wasaarada arrimaha gudaha, waxaana intiisa badan logu hadlay dardar gelinta arrimaha nabadeyna gaalkacyo iyo fulinta qorshayaasha la xiriira nabada ee magaalada.

Wasiirka Wasaarada Arrimaha gudaha federaalka iyo dib u heshiisiinta ee Xukuumada Soomaaliya Cabdi Maxamed Sabriye ayaa sheegay in wasaarada arrimaha gudaha ay wado dadaaladii ugu dambeeyay ee lagu nabadeynayo magaalada Gaalkacyo.

Wasiirka ayaa ugu baaqay xubnaha loo xil saaray nabadeynta Gaalkacyo iney muujiyaan doorkooda shaqadana ay dardar geliyaan.

Gabagabada shirka ayaa waxaa lagu wadaa in laga soo saaro war murtiyeed lagu dhameysirayo howlaha nabadeyna Magaalada Gaalkacyo.

MUDANE KA TIRSAN GOLAHA SHACABKA OO DHUUSAMAREEB LAGU DOORTAY

Magaalada dhuusamareeb ee Caasimadda Galmudug ayaa shalay lagu soo gabagabeeyay kursi ka mid ah Kuraasta ka banaan Golaha Shacabka doorashadiisa.

Kursigaan ayaa horay waxaa u baneeyay Cabdulqaadir Gaafow Maxamuud, waxaana maalin ka hor doorashadiisa ku dhawaaqay Guddiga doorashooyinka Qaranka.

Daraad labo Musharax ayaa ku dhawaaqay in ay ku tartami doonaan Kursigaan.

Guddoomiyihii hore ee degmada deyniile Xiireey Muxudiin Cumar oo doorashada kursiga xildhibaannimo kula tartami lahaa Jeneraal C/llaahi Gaafow Maxamuud ayaa Iscasilay ka hor doorashada.

Ergadda ayaa u codeeyay Gaafow, waxaana Guddiga doorashooyinka ay shaaciyeen in uu ku guuleystay Cabdullaahi Gaafow Maxamuud oo kaligiis kursigaasi ku tartamay.

NINKII SHABAKADDA XAQANI AASAASAY OO DHINTAY

Sarkaal ka tirsan Kooxda Xaqqaan ee dalka Afghanistaan ayaa xaqiijiysay in uu geeriyooday Ninkii Aas Aasay Kooxda, ka dib Xanuun soo wajahay.

"Ninkii aasaasay shabakadda Xaqqani ayaa dhintay ka dib sannado badan oo uu xannuunsanaa Afghanistan” Waxaa siddaasi laga soo xigtay Hoggaamiye ka tirsan Kooxda Taliban.

Jalaluddin Haqqani ayaa ahaa xubin muhiim u ah dadka jihaddoonka ah ee Afghanistaan ku sugan, wuxuuna xiriir dhaw la lahaa Taliban iyo AlQaacida.

Wiilkiisa ayaa la rumaysan yahay in uu masuuliyadda shabakadda kala wareegay 2001 dii.

Shabakadda Xaqani ayaa ka dambaysay weerarro badan oo abaabulan oo sannadihii u dambeeyay lagu bartilmaameedsaday ciidammada xoogagga Nato

CAASIMADAHA MUQDISHO IYO ANKARA OO MATAANOOBAYA ..

Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) iyo wafdi uu hoggaaminayo ayaa gaaray magaalada Ankara ee Dalka Turkiga, halkaas oo ay uga bilaabmatay booqasho rasmi ah.

Guddoomiyaha iyo wafdigiisa ayaa ka qayb galaya saxiixa mataaneynta labada Caasimadood ee Muqdisho iyo Ankara oo maalinta beri ah la saxiixayo. Isagoo sidoo kalena ka qeyb gelidoona shirweynaha Midowga Caasimadaha Caalamka oo ay marti gelineyso magaalada Ankara ee caasimadda dalka Turkiga.

Duqa Muqdisho oo uu weheliyo Danjiraha Soomaaliya u fadhiya Turkiga Mudane Maxamed Jaamac Caydiid ayaa kulan la qaatay dhiggiisa magaalada Ankara Prof. Dr. Mustafa Tuna oo ay ka wada hadleen Maamulka labada Caasimadood ee Soomaaliya mataaneyntooda iyo sidii ay uga wada shaqeyn lahaayeen horumarka, isdhaafsiga khibradaha dhanka Maamulka iyo xoojinta wada shaqeynta.

"Waxaan Kulan ku qotomay xoojinta xiriirka labada Caasimadood wada yeelanay Duqa Ankara Dr. Mustafa Tuna oo isla qirnay muhiimadda ay leedahay mataanaynta labada Caasimadood.”Ayuu yiri Eng. Yarisow.

Guddoomiyaha Gobolka Banaadir ayaa inta uu ku sugan yahay Ankara waxa uu kulammo doceedyo la qaadan doonaa madaxda Caasimadaha ee ka soo qeyb galaya shirka, isagoona kala hadli doona sidii ay iskaashi u wada yeelan lahaayeen.

ISBITAALKA INDHAHA ALNUUR OO FULIYAY MASHRUUC BILAASH INDHAHA LOOGU FIIQAY KUN RUUX

Xarunta Isbitaalka Indhaha AlNuur ee magaalada Muqdisho waxaa maalmihii la soo dhaafay ka socday howlo isugu jira, baaritaano, daweyn iyo indhofiiqid bilaash ah oo loo sameynayo kumanaan qof oo danyar ah.

Agaasimaha Isbitaalka Indhaha AlNuur Dr. C/risaaq Axmed Dalmar ayaa sheegay in dadka ka faa’iideystay mashruucan samafalka ah ay ka kala yimaadeen gobolada dalka qaarkood iyo xeryaha barakacayaasha aysan jirin haba yaraatee wax lacag ah oo laga qaaday.

"Waxaa Isbitaalka Indhaha AlNuur ka socda howlo isugu jira, baaritaan, daweyn iyo indho fiiqis samafal ah kaasoo loogu talo galay in lagu taageero dadweynaha Soomaaliyeed kuwooda danyarta ah ee ku dhaqan magaalooyinka Muqdisho iyo Kismaayo.

Dr. Dalmar ayaa intaa raaciyey in hirgelinta mashruucan samafalka ah ay iska kaashadeen heyadda dhaqaatiirta aan xuduuda laheyn ee Turkiga iyo heyadda AlNuur Foundation, waxaana ka qeyb qaadanaya ayuu yiri dhaqaatiir u dhashay dalka Pakistan iyo kuwo Soomaali ah.

"Mashruucan oo soo socday labadii bilood ee la soo dhaafay, waxaa ka faa’iideystay dad gaaraya 10,000 kun oo qof oo loo sameeyey baaritaano iyo daweyn bilaash ah, waxaana Muraayadaha arraga la siiyey dad ka badan 4,000 kun, iyadoo qaliin fiiqis ahna uu u soo baxay illaa 1,000 qof, kuwaasoo haatan howshoodu ay socoto” ayuu intaa ku daray Dr. Dalmar.

Agaasimaha Isbitaalka AlNuur ayaa sheegay in mashruucan uu yahay kii shanaad ee ay sameeyaan sanadkan uuna qorshuhu yahay in afar kun oo qof si bilaash ah loogu fiiqo indhaha, isagoo tilmaamay 3 kun oo ka mid ah loo sameeyey, kunka harayna ay u qorsheysan bisha Novembar iney indhaha u fiiqaan.

Mashruucan samafalka ah ayuu sheegay iney horey marar badan uga fuliyeen magaalada Muqdisho, gobolada Jubooyinka, degaanada Koonfur galbeed iyo meelo kale ayna ku rajo weyn yihiin iney gaarsiiyaan mustaqbalka degaano cusub.

Wuxuu u mahad celiyey dhamaan heyadaha ka qeyb qaadanaya mashruucan, shaqaalaha Isbitaalka AlNuur, maamulada magaalooyinka Muqdisho iyo Kismaayo ee fududeeyey iyo intii kale ee gacanta ka geysatay fududeynta howshan samafalka ah.

Qaar ka mid ah dadka barakacayaasha ah iyo kuwa danyarta ah ee sida bilaashka ah uga faa’iideystay mashruucan samafalka ah ayaa sheegay in loo sameeyey daweyn iyo qaliimo ay u baahnaayeen indhahooda, aysana jirin wax qarash ah oo laga qaaday, iyagoo u duceeyey maamulka isbitaalka indhaha AlNuur iyo heyadihii kale ee gacanta ka geystay howshan.

Isbitaalka Indhaha AlNuur ee magaalada Muqdisho ayaa maalmahan laga dareemayey Mashquul fara badan, iyadoo ay soo buuxiyeen dad u badan kuwo da’ah oo isugu jiray rag iyo haween kuwaasoo loo sameynayey qaliimo bilaash ah, iyadoo shaqaalaha isbitaalkana ay wadeen howlo ay ku baxnaaninayaan kuwa indhaha loo qalo, kuna diyaarinayaan bukaanada qaliinka loo sameynayo.

Isbitaalka alnur oo si bilaash ah indhaha ugu fiiqay kun ruux

ABAANDUULLAHA CUSUB EE CIIDANKA XOOGGA DALKA OO KORMEERKII UGU HOREEYAY KU TAGAY DEGMO LAGA SAARAY AL SHABAAB

Abaanduullaha ciidanka Xoogga Dalka Soomaaliyeed S/guuto Odowaa Yuusuf Raage oo uu wehliyo Taliyaha Guutada 14ka Oktoobar iyo saraakiil kale, ayaa booqday furumaha ee dagaalka magaalada Marko ee Xarunta gobolka Sh/hoose.

Gen. Odowaa, ayaa mid mid u kormeeray difaacayada Ciidanka Xoogga dalka ay ku leeyihiin magaalada Marko, waxaana uu xog wareystay Ciidanka halkaasi ku sugan, iyaggoo Abaanduulaha Warbixin ka siiyey Xaaladda amni ee Marko.

S/guuto Odowaa yuusuf raage, ayaa waxa uu ciidamada ku dhiirigaliyay in aysan ka niyad jabin dagaalka ka dhanka ah dagaalamayaasha Alshabaab oo hadda ah Koox aan itaal laheyn oo baxsad ah, isaggoo kula dardaarmay in shaqada adag ee ay hayaan ay sii labo jibaaraan.

Abaanduulaha Ciidanka Xoogga dalka, ayaa sheegay in aan loo duqaadan doonin in si sharci darro ah Alshabaab u xasuuqaan dadka shacabka ee aan waxba galabsan, Saraakiisha iyo Ciidanka Magaaladda Marko ku sugan ayuuna faray in ay u diyaar garoobaan dagaal ka dhan ah Alshabaab, si Shacabka looga dul qaado dhibaatada Alshabaab ay ku heyso.

KOOXAHA ISKU HAYA LIBIYA OO XABBAD JOOJIN KU HESHIIYEY

Kumannaan qof aya ku barakacay dagaalka ka socday Tripoli Qaramada midoobay ayaa sheegtay iney kooxaha milishiyaadka ee todobadyadi ugu dambeeyey ku dagaallamayey magaalada Tripoli ay heshiis xabbad joojin gaareen.

Mas'uuliyiin ka tirsan xukumadda Tripoli ayaa waxay sheegen dagaallada guadaha magalada ka socday dhowrki toddobaad ee ugu dambeeyey iney ku dhinteen ugu yaraan 47 qof in kabadan 1,800 qoysna ay ku barakaceen.

Toddobaadki hore waxaa la gaaray heshiis xabbad joojin oo kan la mid ah balse saacada yar kaddib waa la jabiyey.

Dowlad ay qaramada midoobay taageerto ayaa ka arrimisa caasimadda dalka balse, maleeshiyaad dawladda ka soo horjeeda ayuu dlka intiisa kale gacanta ugu jira.

Ghassan Salame oo ah ergeyga qaramada midoobay ka socday ee heshiiska xabbad joojinta waday ayaa wuxuu sheegay 'heshiiska maanta la gaaray inuu soo afjarayo dagaalka magaalada ka socday, laguna badbadinayo dadka rayadka ah ee ay dagaalladaasi saameeyeen'.

Wuxuuna sida oo kale heshiiska gacan ka geysanayaa ayuu yiri sidii dib looga furi gigada diyaaradaha kali ah ee waddanka oo dhan adeeg ka bixiyo ee Tripoli oo gabi ahaanba xidhnaa tani iyo 31ka bisha August.

Wadahadallada looga jiray in la gaaro heshiiska xabbad joojintana waxaa ka soo qayb galay saraakiisha ciidamada dowladda Libiya, hoggamiyeyaasha milishiyaadka iyo xubno ka socday qaramada midoobay.

Heshiiskan ayaa wuxuu ka mid yahay iskudayada lagu doonayo in magaalada Tripoli dagalaaka ka taagan lagu joojiyo, iyada oo laba heshiis oo xabbad joojin oo horay loo gaadhay gabi ahaantoodba la jabiyey.

HADALJEEDINTII MADAXWEYNE MAXAMED CABDULLAAHI FARMAAJO EE SHIRKA MADASHA ISKAASHIGA SHIINAHA IYO AFRIKA

Madaxweynaha Jamhuuriyadda Shacbiga ee Shiinaha iyo Xoghayaha Guud ee Xisbiga Shuyuuciga Shiinaha, Mudane Xi Jinping,

Madaxweynaha Jamhuuriyadda Koonfur Afrika, Mudane Cyril Ramaphosa,

Madaxweynaha Rwanda isla markaana ah Guddoomiyaha Midowga Afrika, Mudane Paul Kagame,

Guddoomiyaha Midowga Afrika, Mudane Musa Faqi Maxamed,

Madaxda Dowladaha, Mudanayaal iyo Marwooyin,

Waxa sharaf ii ah inaan hadaljeedin ku yeesho kulankan muhiimka ah ee iskaashiga Shiinaha iyo Afrika.

Ugu horrayntii, waxaan uga mahadcelinayaa dowladda iyo dadka Jamhuuriyadda Shacbiga ee Shiinaha soo dhawayntoodii diirranayd iyo martisoorkii aniga iyo waftigayga loo fidiyey, intii aannu ku sugnayn magaaladan taariikhiga ah ee Beijing.

Sidoo kale, aniga oo ka faa’idaysanaya fursaddan waxaan jeclahay inaan Jamhuuriyadda Shacbiga ee Shiinaha iyo Jamhuuriyadda Koonfur Afrika oo si wadajir ah u shir guddoominayey Madasha Iskaashiga, uga mahadceliyo dadaallada baaxadda leh ee ay ku bixiyeen qabanqaabada shirkan.

Waxaan kale oo aan ugu hambalyeynayaa Jamhuuriyadda Senegal in ay noqotay dowladda la shir guddoominaysa Madasha soo socota dalka Shiinaha.

Mudanayaal iyo Marwooyin,

Dalka Shiinuhu waxa uu taariikh ahaan Soomaaliya iyo dalal badan oo Afrikaan ah ka taageeri jiray mashaariic waaweyn ee horumarineed.

Tan iyo markii la daahfuray shirka Madasha Iskaashiga Shiinaha iyo Afrika sannadkii 2000, waxa uu horseeday dardargelinta iskaashiga u dhexeeya Shiinaha iyo Afrika, isagoona tilmaam u noqday sida ay Shiinaha uga go’an tahay iskaashi dhexmara dalalka Afrika iyo Shiinaha.

Hubaashii, shirkani waxa uu ibofur u yahay sare u qaadidda iskaashiga dhinaca horumarka, wuxuuna abuurayaa madal ku dhisan wada hadal iyo kalsooni.

Shirka sannadkani waxa uu leeyahay muhiimad gaar ah, sababta oo ah waxa uu ku suntan yahay guul taariikhi ah, maaddaama oo 18kii sanno ee la soo dhaafay uu iskaashi miradhal ah dhexmarayey Shiinaha iyo Afrika.

Waxaannu bogaadinaynaa jawiga loo dhan yahay ee ay ku qabsoomaan wada hadallada iyo wadashaqaynta joogtada ah, taas oo keenaysa in qodobbo waxtar leh ka soo baxaan shirkan.

Soomaaliya waxa ay si buuxda u taageeraysaa go’aanka wadajirka ah ee "Dhisidda bulsho wadaagta mustaqbal” iyo qorshehawleedkii Beijing.

Mudanayaal iyo Marwooyin,

Khudbaddii uu ka jeediyey Madaxweyne Xi Jinping furitaanka Madasha Iskaashiga Shiinaha iyo Afrika, wuxuu ku soo bandhigay qorshe dhammaystiran oo wadashaqaynta Shiinaha iyo Afrika lagu xoojinayo.

Siddeeddii hindise ee uu soo jeediyey Madaxweyne Jinping iyo deeqihii uu Shiinuhu ballanqaaday waxay suurtagelinayaan in la iska kaashado dhinacyada muhiimka ah ee horumarineed si loo gaaro natiijooyin la taaban karo.

Dowladda Shiinuhu waxa ay ku ammaanan tahay fulinta ballanqaadyadeeda, waxaanna ku kalsoonahay in saddexda sanno ee soo socda wax badan la qaban doono.

Xiriirka ka dhexeeya Hindisaha Shiinaha ee Kaabayaasha Dhaqaalaha (Road and Belt Initiative) iyo hiigsiga 2063 ee Midowga Afrika waxa uu xoojinayaa yoolka horumar ee ay wadaagaan dadyowga Shiinaha iyo Afrika.

Mudanayaal iyo Marwooyin,

Aynu kulankeenan ugu dabbaaldegno 40guuradii ka soo wareegtay siyaasaddii Shiinuhu qaatay ee ku salaysnayd furfurnaanta iyo isbeddelka, taas oo muwaadiniin gaaraysa 700 oo milyan ka saartay saboolnimada. Waa guul aynu wax badan ka baran karno haddii aynu helno siyaasado waxtar leh oo lagu kaabay shaqo joogto ah. Waxaa sidoo kale laga baran karaa in nabadgelyada, ammaanka iyo xasiloonida aan la gaari karin haddii aan la daboolin baahiyaha asaasiga ah ee muwaadiniinta.

Soomaaliya waxa ay horumar la taaban karo ka samaysay dhinacyada nabadgelyada, ammaanka, dawladwanaagga iyo siyaasadda la dagaallanka musuqmaasuqa.

Xeebaha Soomaaliya waxa ay taariikh ahaan marin u ahaayeen ganacsiga u dhexeeya Shiinaha, Afrika iyo Jasiiradda Carabta. Haatan, hirgelinta Hindisaha Kaabayaasha Dhaqaalaha (Belt and Road Initiative), iyo ka faa’idaysiga khayraadkayaga dihan ayaa Soomaaliya u sahlaya inay hormuud u noqoto horumarka iyo isku xirnaanta gobolka.

Haddii aynu ka faa’idaysanno fursadahan dhaqaale, Soomaaliya waxay door weyn ka ciyaari kartaa barwaaqada iyo xasilloonida adduunweynaha.

Mudanayaal iyo Marwooyin,

Waxaan aaminsanahay in Madasha Iskaashiga Shiinaha iyo Afrika ay kaalin mug leh ka qaadan karto fududaynta maalgashiyada muhiimka ah iyo xiriirka dadyowga Shiinaha iyo Afrika, si loo gaaro horumar iyo faa’idooyin wadaag ah.

Maaddaama Soomaaliya ay dananayso joogtaynta xasiloonideeda iyo dardargelinta koboca dhaqaaleheeda, waxa ka go’an inay soo dhawayso dhammaan noocyada kala duwan ee maalgashiyada si looga faa’idaysto khayraadka dihan ee dalka, loona gaaro natiijooyin miradhal ah oo ku yimid wadashaqayn laga wada dheefayo.

Ugu danbayntii, aniga oo ku hadlaya magaca wafdigayga iyo kan shacabka Jamhuuriyadda Federaalka Soomaaliya, iga guddooma salaan iyo bogaadin sarraysa. Waxaan dhammaanteen inoo rajaynayaa guul iyo wadahadallo miradhal ah.

Mahadsanidiin. DHAMMAAD

BOGGA CAYAARAHA

RASMI: MOURINHO OO KU DHAWAAQAY LIISKA CIYAARTOYDA KAGA QEYB GALAYA TARTANKA CHAMPIONS LEAGUE

Macalinka kooxda Manchester United ee Jose Mourinho ayaa ku dhawaaqay liiska xidigaha uu u soo xushay in kala qeyb galaan xili ciyaareedkan 2018/2019 tartanka Champions League.

Kooxda reer England ee Manchester United ayaa markii ugu dambeesay ay kusoo guuleysato tartanka Manchester United waxay ahayd sanad-kii 2008.

Hadaba liiska rasmiga ah uu ku dhawaaqay macalinka reer Portugal ee Jose Mourinho si ay kala qeyb galaan tartanka Champions League xili ciyaareedkan 2018/2019 ayaa kala ah.

Goolhaaye: David De Gea, Lee Grant, Sergio Romero,

Difaacyada: Victor Lindelof, Eric Bailly, Phil Jones, Chris Smalling, Marcos Rojo, Diogo Dalot, Luke Shaw, Antonio Valencia, Matteo Darmian,

Khadka Dhexe: Paul Pogba, Juan Mata, Jesse Lingard, Andreas Pereira, Marouane Fellaini, Nemanja Matic, Scott McTominay.

Weerarka: Alexis Sanchez, Romelu Lukaku, Anthony Martial.

RASMI: BARCELONA OO KU DHAWAAQDAY LIISKA XIDIGAHA KAGA QEYB GALAYA TARTANKA CHAMPIONS LEAGUE XILI CIYAAREEDKA 2018-2019

Kooxda Barcelona ayaa shaaca ka qaaday liiskeeda rasmiga ee xidigaha kaga qeyb galaya tartanka Champions League xili ciyaareedka 2018-2019.

Barcelona ayaa tartanka Champions League horey ugu soo guuleesatay 5 jeer, ee kala ah 1992 – 2006 – 2009 – 2011 – 2015.

Hadaba liiska xidigaha uu ku dhwaaqay Ernesto Valverde inay kala qeyb galaan tartanka Champions League xili ciyareedkan 2018-2019.ayaa kala ah:

Goolhaaye: Ter Stegen- Jasper Cillessen- Jokin Ezkieta.

Difaaca: Semedo- Gerard Pique- Samuel Umtiti- Clément Lenglet- Jordi Alba- Vermaelen- Juan Miranda- Jorge Cuenca.

Khadka Dhexe: Arthur- Arturo Vidal- Ivan Rakitić- Denis Suárez- Sergio Busquets- Rafinha- Carles Aleñá- Riqui Puig- Alex Collado- Ramón Moncho- Oriol Busquets

Weerarka: Philippe Coutinho – Messi – Suarez – Ousmane Dembélé – Munir El Haddadi – Malcolm – Abel Ruiz.

WEERARYAHANKA SOUTHAMPTON IYO MAXAMED SAALAX OO SHARAD WADA GALAY!!!

Danny Ings of Southampton during the Premier League match between Southampton FC and Burnley FC at St Mary's Stadium on August 12, 2018 in Southampton, United Kingdom. (Photo by James Williamson - AMA/Getty Images)

(Egland) 04 Sab 2018. Weeraryahanka Southam-pton Danny Ings ayaa Sharad la galay dhaliyaha kooxda Liverpool Maxamed Saalax.

Xiddiga reer Masar ayaa dhaliyay 32-gool Premier League 36 kulan uu saftay isagoona ku guuleystay Kobta Dahabka ee horyaalka Ingiriiska.

Sidoo kale 44 gool ayuu dhali-yay guud ahaan tartamada sanadkii tagay 52 kulan uu saftay.

Danny Ings ee ka mid ah xid-digaha Liverpool balse sanadkan amaahda ugu ciyaaraya Southampton ayaa Maxamed Saalax Sharad kula galay midka goolal badnaan doono labadooda xilli ciya-areedkan.

"Waxaan galnay sharad yar. Saalax waa Saalax. Mid ka mid ah xiddigaha ugu fiican adduunka. Waxay ah-ayd kaftan yar oo inoo dhaxeeyay labadeena. Maxamed waa Saaxiib fiican,” Ings ayaa sidaa yiri.

"Miyaan Gool dhalinta ku garaaci karaa isaga? Waxay noqon doontaa mid aan caqli gal ahayn miyaysan ahayn? Iminka waxaan shaqeeyaa maalin kasta si aan isku hormariyo. Inbadan oo kubbada cagta ah ayaan se-egay.”.

Maxamed Saalax ayaa dhawaan loo Magacaabay saddexda xiddig ee u tartameysa laacibka sanadka ee FIFA iyadoo ay jirto inuu horey uga mid ahaa saddexdii xiddig ee isugu soo haray abaal marinta Laacibka Sanadka ee Yurub uu ku guuleystay Luka Modric

RASMI: LOPETEGUI OO KU DHAWAAQAY LIISKA XIDIGAHA REAL MADRID KAGA QEYB GALAYA CHAMPIONS LEAGUE XILI CIYAAREEDKAN 2018/2019

Macalinka kooxda Real Madrid Julen Lopetegui ayaa wuxuu shaaca ka qaaday liiska rasmiga ah ee ciyaartoyda Los Blancos kaga qeyb gali doonta tartanka Champions League xili ciyaareedkan 2018/2019.

Real Madrid ayaa ku jirta Group G ay kuwada jiraan kooxaha Roma, CSKA Moscow iyo Viktoria Plzen, waxayna u badan tahay Los Blancos in ay groubkan kaga gudbi doonto wareega 16-ka.

Hadaba liiska uu tababare Julen Lopetegui u doortay inay kala qeyb galaan tartanka Champions League xili ciyaareedkan 2018/2019 ayaa waxaa kusoo baxay.

Goolhaaye: Thibaut Courtois, Keylor Navas, Kiko Casilla.

Difaacyada: Dani Carvajal- Jesús Vallejo- Nacho- Raphael Varane- Marcelo – Sergio Ramos- Sergio Reguilón.

Khadka Dhexe: Toni Kroos- Luka Modrić- Casemiro- Iesco- Gareth Bale- Marcos Llorente- Federico Valverde- Asensio- Dani Ceballos.

Weerarka: Mariano Díaz- Karim Benzema- Lucas Vázquez- Vinícius Júnior.

Waxaa xusid mudan Real Madrid ay soo difaacatay tartanka Champions League saddexdii xili ciyaareed ee lasoo dhaafay, waxayna markale dooneysaa inay ku guuleysato markii 4-aad..