ENG.YARISOW "WAXAAN BOGAADINAYAA DHABAR ADAYGGII AQOONYAHANNADA SOOMAALIYEED AY KU SAMATA BIXIYEEN WAXBARASHADA DALKA" .. Duqa Muqdisho ahna Guddoomiyaha Gobolka Banaadir Mudane Cabdirixmaan Cumar Cusmaan (Eng.Yarisow) oo ka qeyb galay munaasabad lagu maamuusayey sanadguurada 20aad ee ka soo wareegtay asaaskii Jaamacadda Muqdisho ayaa ku boogaadiyey dadaallada ay ku bixiyeen aqoo nyahannada Soomaaliyeed badbaadinta mustaqbalka da'yarta iyo hirgelinta fursadaha waxbarasho ee dalka.

Guddoomiyaha ayaa dul istaagay dhabar adayggii iyo hal abuurkii bahda waxbarashadu ay ku samata bixiyeen waxbarashada dalka wakhtiyadii burburka, isagoona sheegay in dhammaan hawlwadeen nadii wakhtigooda iyo maalkoodaba u horay barbaarinta iyo kobcinta aqoonta jiilasha maanta ay baal dahab ah kaga jiraan sooyaalka shacabka Soomaaliyeed.

  "Iyadoo dalka ay ka jirto xaalad adag, qofkastana ay nolashu ku culustahay ayaa waxaa horumarinta waxbarashada dhexda u guntaday aqoonyahanno Soomaaliyeed oo aan helin taageero dowladeed, maantana waxa ay ina gaarsiiyeen in aan ku faani karno heerka waxbarasho ee ka jirta dalka.”

       Eng.Yarisow ayaa sheegay in dib u kabashada dalka, dowladnimada iyo kobaca wacyiga bulshada ay xoojinayaan nidaamka waxbarashada dalka, culayskana ay ka fududeysay, gaar ahaan mideynta manhajka,isku xirka bahda waxbarashada,     taakuleynta iyo tayeynta macalimiinta, dalladaha iyo xarumaha waxbarashada.

           "Aqoonyahannada Soomaaliyeed waxaa laga rabaa in ay udub dhexaad u noqdaan qorshay aasha lagu wajahayo caqabadaha dib u dhigay himilooyinka shacabkeenna oo ay ugu horreyso qab yaaladda iyo musuqmaasuqa, sababtoo ah aqoontu ayaa lagu daaweeyaa dhibaatooyinka soo food saara ummadaha.”

         Guddoomiyaha Gobolka Banaadir ayaa ugu hambalyeeyay  maamulka,macalimiinta iyo ardayda Jaamacadda Muqdisho sannad guurada 20aad ee ka soo wareegtay asaaska Jaamacaddan,waxa uuna kula dardaarmay in qoondo waxbarasho loo sameeyo dadka barakacayaasha ah, maadaama aysan dhaqaale ahaan inta badan awoodi karin ku biirista Jaamacadaha. —DHAMMAAD–

QARAXYO KA DHACAY MUQDISHO

  Faahfaahino dheeraad ah ayaa waxa ay kasoo baxayaan Qaraxyo ka dhacay Suuqa Xoolaha gaar ahaan Agagaarka Sos, kuwaasoo lala eegtay Ciidamo ka tirsan howlgalka Midowga Afrika ee AMISOM.

  Sidda ay Risaala u xaqiijiyeen goobjoogayaal laba Qarax ayaa lala eegtay Ciidamada AMISOM, oo Maraayay Suuqa Xoolaha gaar ahaan Agagaarka SOS.

            Qaraxyadda ayaa ahaa Miinadda nooca dhulka lagu Aaso, waxaana la sheegay in ay daqiiqado kala dambeeyeen.

  Qarax koowaad ayaa qabsaday mid kamid ah gawaarida dagaalka Ciidamada AMISOM, Waxaana qaraxa ka dib Ciidamada AMISOM ay fureen rasaas badan .

  Daqiiqado ka dib ayaa sidoo kale waxaa dhacay Qarax kale, Waxaana la sheegay in uu qabsaday gaari ay leeyihiin Ciidamada AMISOM oo taagnaa meel aan ka fogeyn halkii uu ka dhacay Qaraxii hore.

       Waxaa jira Khasaare dhaawac ah oo soo gaaray dad Shacab ah oo goobta Maraayay, islamarkaana ay gaareen xabadihii ay fureen Ciidamada AMISOM.

  Ciidamada AMISOM ayaa la sheegay in ay wali ku sugan yihiin halkii ay qaraxyo ka dhaceen, islamarkaana waxaa halkaasi gaaray ciidamo ka tirsan dowladda.

MAXAAD KA TAQAAN XUBNAHA GOLAHA WASIIRADA EE HEYSTA DHALASHADA CANADA ?

  Inkastoo dowladda Soomaaliya ay la safatay Boqortooyada Sacuudi Carabiya oo khilaaf diblomaasiyadeed kala dhaxeeya Canada ayaa hadana xubanaha dowladda ku jira sida Golaha Wasiirada, Xildhibaanada labada aqal, taliyeyaasha ciidamada iyo agaasimayaasha qaar waxay heystaan dhalashada dalka Canada.

  Mowqifka Dowladda Soomaaliya ku taageertay Sacuudiga ayaa dhaliyay dood iyo hadal heyn hareysay baraha bulshada, taasoo dad badan ku tilmaaman mid degdeg ah oo fudeed ka muuqday.

  Dadka qaar ayaa tusaale u soo qaadanaya hab dhaqanka labada dowladood iyo cida Soomaaliya taageertay, kaddib burburkii dowladda Dhexe, iyadoo Canada ay ku nool yihiin Soomaali fara badan, kuwaasoo si weyn loogu soo dhoweeyay, heystana dhalashada dalka, qaarkoodna xilal Ka haya, sida Wasiirka Socdaalka dalkaas.

  Sidoo kale dowladda Sacuudiga ayaa labaatankii sano ee la soo dhaafay dalkeeda ka soo tarxiishay muwaadiniin fara badan oo Soomaaliya.

  Arrinta kale oo layaabka ayaa ah inta badan Golaha Wasiirada Xukuumada Soomaaliya ay yihiin kuwo heysta dhalashada dalka Canada, oo uu ku jiro Wasiirka Arrimaha Dibadda Soomaaliya Axmed Ciise Cawad oo qoraalka laguma safray Sacuudiga ka soo baxay Wasaaraddiisa.

HADDABA AKHRISO XUBNAHA WASIIRADA EE HEYSTA DHALASHADA DALKA CANADA:

1 Wasiirka Arrimaha Dibadda Axmed Ciise Cawad

2 Wasiirka Shaqada iyo Arrimaha Bulshada Saalax Axmed Jaamac

3 Wasiirka Dastuurka C/raxmaan Xoosh Jibriil

4 Wasiirka Gaadiidka iyo Duulista Hawada Maxamed C/llaahi Salaad Oomaae

5 Wasiirka Qorsheynta Jamaal Maxamdd Xasan

6 Wasiirka Haweenka iyo Xuquuqul Insaanka Deeqo Yaasiin

7 Wasiirka Waxbarashada Soomaaliya C/llaahi Goodax Barre

8 Taliyaha Nabadsugida Qaranka Xuseen Cismaan Xuseen, 9 Senator iyo Xildhibaano Golaha Shacabka.

KOOXO HUBEYSAN OO DIL GEYSTAY MUQDISHO

  Kooxo hubaysan ayaa  Degmada Kaaraan, gaar ahaan Suuqweynaha waxa ay ku dileen askari ka tirsan ciidamada  Milatariga Soomaaliya.

  Askarigaan ayaa la sheegay xilliga la dilayay inuu ka soo baxay hoygiisa oo ku yaallo Degmada Kaaraan, dableyda hubaysana ay ku dileen meel aan sidaasi kaga fogeyn gurigiisa.

  Wararka ayaa waxa ay sheegayaan dableydii dilkan gaysatay inay ka baxsadeen goobta, kadib markii ay toogteen askariga.

  Ciidamada Booliska Saldhiga Degmada Kaaraan ayaa tagay goobta lagu dilay askariga, waxayna halkaasi ka soo qaadeen maydka marxuumka la dilay.

  Al Shabaab ayaa muddooyinkaan dambe kordhiyay beegsiga iyo dilalka qorsheysan ee ay u gaysanayaan ciidamada ka tirsan dowladda Fedeeralka Soomaaliya.

RA’IISUL WASAARE KHEYRE OO DALKA DIB UGU SOO LAABTAY

  Ra’iisul wasaaraha Xukuumadda Federaalka Soomaaliya Mudane Xasan Cali Kheyre iyo wafdi uu hoggaaminayo ayaa dalka dib ugu soo laabtay ka dib booqasho ay ku tageen Magaalada Khartuum ee caasimadda dalka Suudaan.

  Ra’iisul wasaare Kheyre ayaa intii uu ku sugnaa dalka Suudaan wuxuu uu goob joog ka noqday saxiixa heshiiska taariikhiga ah ee dhinacyada isku hayay siyaasadda dalka Suudaanta Koonfureed kuwaas oo dhexdhexaadin waqti dheer qaadatay kadib isku raacay in ay dhistaan dawlad midnimo qaran oo dhinacyada dhan ay ku qanacsanyihiin, iyadoo Ra’iiul wasaaraha uu ku amaanay ammaanay dhinacyada heshiiska saxiixay tanaasulka iyo biseylka siyaasadeed oo ay muujiyeen si ay u badbaadiyaan mawaadiniinta dalkooda, ugana qayb qaataan horumaka gobalka iyo guud ahaan qaaradda Afrika, waxa uuna u xaqiijiyay in Soomaaliya ay ka go’antahay nabadda, amniga iyo xasilooni siyaasadeed ee Suudaanta Koonfureed.

  Sidoo kale Ra’iisul Wasaare Xasan Cali Khayre ayaa kulan uu la qaatay Madaxweynaha Suudaan kaga mahad celiyay taageerada dhanka waxbarashada, isaga oo hoosta ka xariiqay in xilli aduunyada inteeda kale ay u arkaysay Soomaaliya rajo aysan lahayn, Suudaan ay garaawsatay in la caawiyo si loo siiyo fursad ay kusoo kabato, waxa uuna sheegay in ardaydii Suudaan wax ku baratay ay ka qayb qaateen dib u dhiska dalka Soomaaliya.

  Mudane Xasan Cali Khayre oo sidoo kale booqday xarunta jaamacadda Caalamiga Ee Afrika ee magaalada Khartuum oo ay wax ka bartaan ardaya Soomaaliyeed ee ugu badan ee dalkaas waxbarashada u jooga, ayaa kula kulmay madaxda jaamacadda iyo xubna kamid ah ardayda Soomaaliyeed ee ee jaamacadda wax ka barta, wuxuuna mahadceliyay taageerada waxbarasho ee joogtada ah, waxa uuna si gaar ah u xusay in Suudaan ay kamid tahay dalalkii ugu horreeyay ee Soomaaliya ka taageera waxbarashada kadib burburkii dawladdii dhexe.

WAA TEE DOWLAD GOBOLEEDKII UGU HORREYSAY EE U HAMBALYEYSA MADAXWEYNAHA CUSUB SOOMAALIDA ETHIOPIA?

  Waxaa weli qalallaase iyo ay ka jirtaa dhibaato magaalada Jig jiga ee xarunta dowlad deegaanka Soomaalida Ethiopia.

  Qalallaasaha ayaa yimid kaddib markii Sabtidii ay ciidanka federaalka Ethiopia weerar kusoo qaadeen madaxtooyada oo ay gacanta ku dhigeen madaxweynihii maamulkaas mudane Cabdi Max’uud Cumar.

  Tan iyo maalinkaas waxaa deegaanka ka jiray qalallaase u dhaxeeyay Soomaalida iyo qowmiyadda Oromada, kaas oo sababay in ay dad badan dhintaan bankiyo la dhaco, Kaniisado la gubo dad kalena ay ku waxyeeloobaan.

  Haddaba intaas waxaa xigtay is casilaadda madaxweyne Cabdi Max’uud Cumar, waxaana is magacaabay ee Axmed Cabdi Maxamed (Ilkacase) kaas oo ahaa kuxigeenkii Cabdi Max’uud Cumar.

  Maamulka Jubbaland ee Soomaaliya ayaa noqday maamulka keliya ee ka hadlay xaaladda deegaankaas, sidoo kalena u hambalyeyay madaxweynaha cusub ee maamulkaas mudane Axmed Cabdi.

  "Waxaan soo dhoweynayaa una hambalyaynayaa Madaxweynaha cusub ee Dowlad Deegaanka Soomaalida, Mudane Axmed Cabdi Maxamed. Sidoo kale, waxaan ugu mahad naqayaa Madaxweynihii hore, Mudane Cabdi Maxamuud Cumar wanaagii iyo waxqabadkii weynaa ee uu qabtay mudadii uu xilka hayey.” ayaa lagu yiri war kasoo baxay xafiiska warfidiyeenka ee maamulka Axmed Madoobe.

  Hoggaamiyaha Jubbaland Axmed Madoobe oo jufo ahaan ay wada dhasheen madaxweynaha cusub ayaa u rejeyay in wanaag uu kusoo dhammaado is af garan waaga ka taagan deegaannada Soomaalida Ethiopia.

MEYDADKA DAD KA SOO JEEDA QOWMIYADDA OROMADA OO LAGA HELAY MAGAALADA BOOSAASO

  Waxaa shalay magaalada Boosaaso ee xarunta gobolka Bari laga helay meydadka laba ruux oo ka soo jeeday qowmiyadda Oromada, kuwaasi oo oo dadka degaanka ay sheegeen in la dilay.

  Dadka degaanka qaarkood ayaa waxa ay sheegeen labada ruux ee la dilay oo dhalinyaro ahaa in mid ka mid ah uu qoorta ka jabnaa, waxaana arrintan si weyn u hadal haya dadka ku nool magaalada Boosaaso ee xarunta gobolka Bari.

  Saraakiil ka tirsana ciidanka ammaanka Puntland ayaa meydadka ka qaaday halkaasi, waxayna geeyeen isbitaalka magaalada Boosaaso, ciidamada ayaa bilaabay hawlgal ay ku baadi goobayaan cidii ka dambeysay falkan.

  Ilaa hadda si dhab ah looma oga cida falkan geysatay, maalmo kahor ayay aheyd markii muuqaal kooban oo baraha bulshada la soo geliyay uu ka muuqanayay nin Oromo ah oo dadka shacabka ah ay dilayaan, kaasi oo hada dhaawac ahaan u yaalla mid ka mid ah isbitaalada ku yaalla magaalada Boosaaso.

  Guddoomiyaha Gobolka Bari Yuusuf Maxamed Waceys Dhedo ayaa war uu daraad soo saaray shacabka kaga digay inay dhibaateeyaan dadka ka soo jeeda qowmiyadda Oromada ee ku nool magaalada Boosaaso.

ARDAYDA SOOMAALIYEED EE WAX KA BARTA SUUDAAN OO CABASHO KA GUDBIYAY SAFAARADDA SOOMAALIYA EE KHARTUUM

  Ardayda Soomaaliyeed ee wax ka barta dalka Suudaan ayaa gudbiyay cabasho ka dhan ah ah Mas’uuliyiinta Safaaradda Soomaaliya ee magaalada Khartoum, kaddib kulan ay la qaateen Ra’iisul Wasaare Xasan Cali Kheyre oo maalmahan ku sugnaa Khartuum.

  Kulan ay soo qaban qaabiyeen Midowga Ardayda Soomaaliyeed ee dalka Suudaan ayaa waxay ku soo bandhigeen dhibaatooyin ardayda kala kulmaan Safaaradda Soomaaliya ee Khartoum

  "10 qof raalli galintood kuma badalanayo 7000 oo Arday, Mudane Ra’iisul Wasaare haddaan nahay ardayda Soomaaliyeed, Waxaan qabnaa Dulmi, dulmigaas nooma aysan geysan dad Ajnabi ah ee waxaa noo geystey shaqaalaha Soomaaliyeed ee Safaaradda, Waxaa safaaradda lagu iibiyaa Minxooyinka waxbarashada, hadii aad nooga tagtid dulmigaas, ogow waad na dulmisay, Mudane Waxaad Xabsiyada Liibiya ka soo daysaan dhalinyarta Soomaliyeed, Safaaradda Soomaaliya ee Suudaan way sii tahriibisaa”sidaa waxaa yiri Guddoomiyaha Midowga Ardayda Soomaaliyeed ee Suudaan C/qaadir C/llaahi oo ilmeynaya.

  Ra’iisul Wasaaraha oo ka Jawaabayay cabashada Ardayda ayaa ballan qaaday in haddii ay sax noqdaan waxa ay Ardayda ka cabanayaan, in sida ugu dhaqsiyaha badan uu uga qaadi tallaabada ugu haboon

  Diblomaasiyiinta ugu sareysa ee Safaaradda ayaa lagu eedeynayaa inay ka gaabiyeen howlihii loo igmaday, iyagoo u weecday inay ka shaqeeyaan Arrimaha Tahriibka sida, Fududeynta Tahriibka Liibiya iyo Leemanka cusub oo lagu diro dadka wato Baasaboorada Dowladda.

  Safaaradda ayaa hadda ka dhex taagan is qabqabsi xooggan oo u dhaxeeya Siihayaha Safiirka iyo Diplomaasiyiin la soo magacaabay markii uu xilka ka dagayay Madaxweynihii hore ee Soomaaliya Xasan Sheekh Maxamuud, kuwaasoo intooda badan ah dhalinyaro aan Wasaaradda Arrimaha Dibadda ka soo shaqeyn, wax tababar diplomaasiyadeedna aan laheyn.

  Cabashooyinka laga soo gudbiyay Safaaradda ma ahan mid cusub, waxaa jirtay Cabashooyin horey looga gudbiyay Danjire Maxamed C/llaahi Ugaas oo ahaa Safiirkii ugu dambeeyay ee dowladdu xilka ka qaaday sanadkii hore, isagoo magacaabistiisii hore ay Dowladda Suudaan soo celisay una jartay (Persona non grata ) kaddib waxaa dowladda Suudaan kala hadlay Sheekh Shariif xilligii uu Madaxweynaha, sidaasna dowladda Suudaan ku tixgelisay.

  Muddo ku dhow 7bilood ayaa Safaaradda Soomaaliya ee Suudaan ay tahay mid aan Safiir laheyn, kaddib xil ka qaadistii Safiirka, waxaana kusime ka ah Axmed Ibraahim Buurfuule oo Safaaradda ugu Magacaaban Xoheynta 1aad, hase ahaatee waxaa dhowaan lagu wadaa in Safaaradda Suudaan lagu soo qoro C/risaaq Shoole oo dhowaan Golaha Wasiirada u magacaabeen inuu Safiir noqdo.

XILDHIBAAN SI KULUL U NAQDISAY QARAARKA XUKUUMADDA EE XIISADDA SACUUDIGA IYO KANADA

  Iyada oo ay dowladda Soomaaliya caddeysay mowqifkeeda ku aadan khilaafka u dhaxeeya boqortooyada Scauudiga iyo dowladda Canada, oo ay is dhinac taagtay maamulka Riyad ayey xubin ka tirsan baarlamaanka Soomaaliya si kulul u naqdisay go’aanka dowladda.

  Xildhibaan Sagal Isaaq Biixi oo qoraal soo dhigtay tirsiga ay ku leedahay barta twitter ayaa sheegtay in uu yahay wax lagu qoslo mowqfika dowladda federaalka ah.

  "Waa wax lagu qoslo oo meel ka dhac ku ah guud ahaan haweenka meel walba oo ay joogaan, gaar ahaan dumarka Soomaaliyeed. Intii aan u doodi lahayn xuquuqdooda waxa aan dhinac istaageynaa wadan uu ka jiro dhaqanka carsijaahiliga, oo haweenka ula dhaqma sidii wax liita oo aan qiimo ku fadhin, waxa aan garaaceynaa durbaanka niyadjabka” ayey tiri xildhibaan Sagal Isaaq Biixi.

  Qoraalkeeda ayaa intaas ku daray, "WarqaddanBayaanka dowladda Soomaliyakama hadleyso waxa ka dhex jira Sacuudiga iyo Kanada balse waxa ay bidhaamineysaa heerka sida arrimaha haweenka aysan ugu jirin siyaasadeenna iyo go’aamadeenna maalinlaha ahwaa wax laga xumaado” ayey tiri xildhibaan Sagal.

  Xiisadda  Sacuudiga iyo Kanada ayaa ka dhalatay markii ay xukuumadda Toronto sheegtay in ay aad uga walaacsan tahay xiritaanka loo gaystay dad xuquuqda aadanaha u dooda.

  Dadka la xiray waxaa ka mid ah Samar Badawi oo u dhaqdhaqaaqda xuquuqda dumarka oo Sacuudiga u dhalatay haysatana dhalashada Maraykanka.

  Samar ayaa ku baaqaysay in la so af jaro habka Sacuudiga looga dhaqmo ee muxramka.

  Xiritaankan ayaa yimid iyadoo amiiirka dhaxalka leh ee Sacuudiga Maxamed Bin Salman uu sannadkan sameeyay isbadallo.

SHABAAB OO QARAX LA EEGTAY CIIDANKA KENYA..

  Xoogag hubeysan oo ka tirsan Ururka Al Shabaab ayaa qarax Miino waxa ay ciidanka Kenya kula eegteen degaan ka tirsan gobolka Xeebta ee Lamu.

  Gaari nuuca dagaalka ah oo ay la socdeen ciidanka Millatariga Kenya ee loo yaqaano (KDF) ayaa qaraxan si gaar ah ugu qabsaday inta u dhaxaysa Kenyatta Forest iyo Bodheey oo ka wada tirsan gobolka Lamu.

  Saraakiisha ciidanka ammaanka dalka Kenya oo la hadlay warbaahinta ayaa waxa ay sheegeen qaraxan inay kaga dhinteen ilaa Shan askari oo ciidankooda ka tirsanaa, sidoo kalena ay ku dhaawacmeen ilaa Lix kale.

  Waxay kaloo sheegeen saraakiisha ciidanka Kenya inay jawaab ka bixin doonaan qaraxan, iyaga oo sidoo kale tilmaamay inay warbixin dhameystiran ka soo saari doonaan qaraxan, islamarkaana ay ku daba jiraan raggii weerarka geystay.

  Shabaab war ay ku soo qoreen baraha ay wararkooda ku faafiyaan ayaa waxa ay ku sheegteen in qaraxaasi ay ku dileen Sagaal askari oo Kenyan ah, kadib markii gaari ay saarnaayeen qabsatay Miino dhulka lagu aasay.

  Ururka Al Shabaab ayaa qalqal xoogan geliyay amniga guud ee dalkaasi Kenya, tan iyo markii Ciidanka Militariga Kenya ay gudaha u soo galeen Gobolada Koonfurta Soomaaliya, dabayaaqadii sanadkii 2011ka.

GABAR AFRIKA KASOO JEEDDA OO MARKII UGU HORREYSAY XILDHIBAANAD KA NOQONEYSA PAKISTAN

  Baarlamaanka waddanka Pakistan ayaa lagu wadaa in markii ugu horeysay ay ka mid noqoto haweeney asal ahaan kasoo jeedo Afrika, taasi oo sumcad usoo hoyneysa qowmiyada tira yar saboolkana ah ee Sidi oo qarniyaal badan degganaa dalkaasi.

  Tanzeela Qambrani, oo 39 jir ah ayaa xisbiga ra'iisal wasaarihii hore ee Pakistan Benazir Bhutto ee (PPP), waxa ay u sharaxeen kursiga loo qoondeeyay haweenka ee baarlamaanka gobolka koonfur barri.

  Haweeneydan ayaa rajeyneyso kaddib doorashadii bishii lasoo dhaafay inay gacan ka geysato in laga gudbo dhaqanka qowmiyada Sidi ee ah in dumarku aysan xil qaban karin, qowmiyadaan Afrikaanka ah ayaana ku badan gobollada xeebta Makran iyo Sindh ee dalkaasi.

  "Inaga oo ah qowmiyad tiro yar oo ku dhex luntay qowmiyado kale oo ka tira badan, ayaan u halgameynaa inaa ilaashano dhaqankeena iyo dhalashadeena Afrikanimo, blase waxaan sugeynaa maalinta magaca Sidi uu ixtiraam helayo, ayay tiri," Qambrani, oo ah Afrikan asal ahaan kasoo jeeda Tanzania, sida ay BBC u sheegtay .

  Qowmiyada Sidi oo u dabaaldegaysa sanad guurada Mangho Pir

  Qaar badan oo ah dadka Sidis ayaa rumeysan inay ka farcameen dadkii la adoonsan jiray oo Burtaqiisku ka keenay Afrika.

  Taariikhyahannada ayaa sidoo kale sheegay in qowmiyadaan ay soo gaareen iyaga oo ah askar, ganacsato, darawalo iyo muslimiin xujey ah.

  Qowimiyadan ayaa xilal sarsare soo qabatay xiligii boqortooyada Mughal balse waxaa so wajahay takoorid xiligii gumeystaha Britain.

  Tiro ahaan waxa lagu qiyaasaa tobanaan kun oo qof in ay yihiin qowmiyadan.

  Waxa ay sidoo kale ku nool yihiin gobollada Karnataka, Gujarat Andhra iyo Pradesh ee dalka Hindiya.

  Haatan dadka Sidis ee ku nool deegaanka Lyari ee caasimada Karachi ayaa taageeraya xisbiga PPP ee uu hogaamiyo wiilka Benazir Bhutto ee Bilawal Zardari Bhutto.

  Xisbiga PPP ayaa kusoo baxay kaalinta saddexaad doorashada guud ee dhawaan ka dhacday dakaasi, oo uu ku guuleystay xisbiga xiddigii hore ee kirikitka Imran Khanee PTI.

  Ms Qambrani, waxa ay shahaado ka heysataa cilmiga kumbuyuutarka, waana hooyo heysata saddex caruur ah.

  Aabaheeda oo Abdul Bari, waxa uu ahaan jiray qareen halka hooyadeedna ay ahayd macalimad iskuul mardambena shaqada ka fariisatay.

  Qoyskeeda waxa ay aad ugu dadaaleen ilaalinta asalkooda Afrikanimo, midka mid ah gabdhaha la dhashay waxa ay ku guursatay Tanzania, halka midkale oo la dhalatayna uu qabo nin u dhashay Ghana.

  Sikastaba, si la mid ah dadka Sidis ee Pakistan, Tanzeela Qambrani waxa ay muddo dheer taageersaneed xisbiga PPP. Waxa ayna khibrad u leedahay arrimaha siyaasadda iyada oo soo noqotay xubin ka tirsan baarlamaan goboleed.

CIIDAMMO CUSUB OO LA KEENAY ISGOOYSYADA MUQDISHO

  Wararka aan ka heleyno qeybo kamid magaalad Muqdisho ayaa waxa ay sheegayaan in shalay lagu arkay qeybo kamid ah Isgooysyada muqdisho ciidammadii Nabad sugidda ee dhawaan laga qaaday Isgooysyada.

  Ciidammada Isgooysyada lagu arkay ayaa ku labisnaa dharka ciidammada Booliska Soomaaliya, dhawaanna ciidammadii Nabad sugidda muqdisho waxaa lagu daray Booliska.

  Meelaha lagu arkay ciidankan waxa kamid ah Isgooysyada Taleex iyo Dabka ee Muqdisho.

  Ciidamadan ayaa waxaa la sheegay inuu taliye uyahay Taliyaha ciidamada Asluubta Soomaaliya Jeneraal Sulub Axmed Fariid.

  Askarta la keenay Isgooysyada Muqdisho ayaana la ogeyn qaabka ay wax uga badali doonaan amaanka Caasimadda.

XOGHAYIHII JOOGTADA WASAARADDA GARGAARKA OO IS CASILAY

  Maxamed Cumar Macalin oo ahaa Xoghayihii joogtada ee Wasaaradda Gargaarka iyo Maaraynta Masiibooyinka Xukuumadda Federaalka Soomaaliya aya iska casilay xilkii uu ka hayay Wasaaradaasi.

  Xoghayaha ayaa warqad uu soo saaray ku sheegay inuu isku casilay duruufo adag oo u saamixi waayey inuu sii wato shaqadii uu u hayey wasaaradda Gargaarka iyo Maareynta.

  Sidoo kale wuxuu sheeegay inay kala aragti duwanaansho u dhaxaysay isaga iyo Wasiirka Wasaaradda Xamza Saciid Xamza, islamarkaana aanu ku qancin qaabka shaqo ee wasiirka.

  Ilo wareedyo ayaa waxa ay sheegeen in is casilaaddan ay la xiriirto kiis dhawaan ka dhacay wasaaradda oo lagu xiray Daahir Maxamed Nuur oo ahaa Agaasimihii Waaxda Dib u Dejinta Barakacayaasha oo haatan ku jira xabsi, kadib markii dawladda Soomaaliya ku eedaysay xatooyo xoolo dadweyne.

  Maalmahan dambe waxaa jiray is qab qabsi mararka qaar soo kala dhexgala Wasiirada Wasaaradaha Xukuumadda iyo masuuliyiinta ka hoos shaqeeya, waxaana dhacda mararka qaar inay soo saaraan warqado isku jawaabid ah oo awood sheegasho ah.