Wararka inaga soo gaaraaya Degmada Balcad Ee Gobolka Shabellaha Dhexe, ayaa waxay sheegayaan in mid ka mid ah Ciidamada Hay'adda Nabad Suggida uu Degmadaasi ku dilay laba qof oo shacab ahaa. Askarigan, ayaa labadaasi qof ku dilay boosteejada laga raaco gawaarida aadda Xarunta Gobolka Shabellaha Dhexe Ee Magaalada Jowhar. Dilka ayaa ka dambeeyay markii askarigaasi ay wada murmayn nin dhalinyaro ahaa.

Wararka waxay intaa ku darayaan in askarigu uu rasaas ku furay ninkaasi, taa oo dhalisay geerida ninkaasi dhalinyarada iyo nin kaloo oday ahaa, oo ka ag-dhawaa halkaasi.

Gudoomiye Ku Xigeenka Dhinaca Ammaanka Maamulka Degmada Balcad, C/laahi Maxamed Xasan, ayaa wuxuu xaqiijiyay in askarigaasi uu 5-tii galabnimo ee shalay uu labadaasi qof ku dilay Degmadaasi.

Gudoomiye Ku Xigeenka, ayaa sidoo kale sheegay in Ciidamada Dowladdu ay gacanta ku soo dhigeen dembiilaha, isla-markaana uu ku xiran yahay xabsi ku yaala Degmada Balcad.

Ciidamada Dowladda Somaliya, ayaa waxaa qaarkood la tilmaamaa inaanay lahayn anshaxa ciidanimo, isla-markaana ay si khalafsan ula dhaqmaan shacabka ay u dhaarteen inay cadowga ka difaaci doonaan.