Heyadda Culimada Soomaaliyeed ayaa uga digtay hotelada magaalada Muqdisho in lagu qabto xaflado lagu xusayo ciida loo yaqaano Kirismiska oo ku beegan 25-ka bishan Disembar oo maalmo kooban ay naga xigaan. Gudoomiye ku-xigeenka heyadda culimada Shiikh Nuur Baaruud ayaa sheegay in ciida Kirismiska ay leeyihiin Gaalada, dadka muslimiinta ahna aysan shuqul ku laheyn sidaas awgeedna ay tahay iney ka fogaadaan.

"Waxaa igu maqaalo ah in hotelada Muqdisho qaarkood ay isku diyaarinayaan iney sameeyaan xaflado lagu xusayo ciida Kirismiska, waxaan ka digeynaa arintaas shacabkan waa islaam, ciida la sheegayana gaalo ayaa sameysatay, waxaana ku baaqeynaa inaan umadda laga fasahaadin diinteeda, arimahaas haddii ay jiraana si adag looga hortago” ayuu yiri Gudoomiye ku-xigeenka.

Shiikh Nuur Baaruud Gurxan ayaa sheegay in dadka muslimiinta ah ay leeyihiin labo ciidood oo kala ah Ciidul Fitri iyo Ciidul adxaa, ayna ka xariman tahay iney u dabaal-degaan ama ka qeyb qaataan ciido ay leeyihiin dad diimo kale heysta.

"Arintan waxay marmarsiiyo fiican u yeeleysaa Al-shabaab oo dadka ay duufsadaan u sheegaya in meesha aysan kaa jirin diin, hoteladiina lagu dhigayo xaflado ciida gaalada loogu dabaal-degayo diimaha gaalada sidaa awgeed waa in laga waantoobaa” ayuu yiri Shiikh Nuur Baaruud.

xigasho:-dayniile.com