Madaxweynaha Dowladda Jabuuti Ismaaciil Cumar Geelle ayaa markii ugu horeysay si cad u sheegay sababta looga adkaan la'yahay ururka Al-Shabaab ee ka dagaalama dalka Soomaaliya, isagoona sheegay in dalalka caalamka ay ka gaabiyeen la dagaalanka kooxaha argagixisada ah ee khatarta ku ah amniga dalka. Ismaaciil Cumar Geelle oo la hadlayay idaacadda BBC-da laanteeda afka Soomaaliga ayaa sheegay in dalalka caalamka ee ay ku sugan yihiin kooxaha argagixisada ah oo uu ka carabaabay dalka Afhanistan sida caalamku ugu soo gurmaday aanay uga taageerin Soomaaliya.

"Soomaali Soomaali kale dileysa weeyaan waxa ka dagaalamaya dalkaas, mid la yiri janaad geli, mid la yiri naftaada keen wuu keenayaa” ayuu yiri Madaxweyne Ismaaciil Cumar Geelle oo dalkiisa ka mid ah wadamada Soomaaliya la garab taagan taageerada hiil iyo hooba leh.

Dhinaca kale Madaxweynaha Jabuuti waxaa kale oo uu sheegay in kooxaha argagixisada ah aan laga adkaan karin haddii aanay dalalka caalamka isku kaashan sidii looga hortegi lahaa.