DUQA MUQDISHO OO GO'AANO KA SOO SAARAY ISQAB QABSIGA DHULALKA EE MUQDISHO Guddoomiyaha Gobolka Banaadir ahna Duqa magaalada Muqdisho C/raxmaan Cumar Cusmaan (Eng. Yariisow) ayaa go'aano adag ka soo saaray isqab qabsiga dhulalka ee ka jira magaalada Muqdisho ee caasimadda Soomaaliya.

          Wuxuu sheegay in Mamaulkiisa uusan aqbali doonin in xoog lagu kala heysto dhulalka magaalada Muqdisho, sidoo kalena awood aanan loo sheegan doonin dadka danta yar ee ku nool Muqdisho.

          Sidoo kale wuxuu sheegay mudada kooban ee uu joogo xafiiska Gobolka inuu il gaar ah ku fiirin doono arrimahan, wuxuuna tilmaamay in dhulalka Danta guud aanan loo adeegsan doonin dan gaar ah.

          "Waad la socotaan arrimaha dhulalka oo dhibaatooyin badan ay ka jireen, oo dhulal dan guud ahaa aan talaabo ka qaadnay, welina aan ku raadjoogno inta dhiman, waxaanan aqbali doonin in qof Bani’aadam ah lagu xad gudbo, ma aqbali karno in la qaato dhul dan guud ah.” Ayuu yiri Duqa Muqdisho.

          C/raxmaan Cumar Cusmaan (Eng. Yariisow) Guddoomiyaha Gobolka Banaadir ahna Duqa magaalada Muqdisho ayaa hadalkan ka sheegay kulan shalay lagu soo dhaweynayay Maamulka Gobolka oo Muqdisho ka dhacay, kaasi oo ay ka qeyb galeen Wasiiro iyo Xildhibaano Dowladda Federaalka ka tirsan.

          30kii January 2018 Guddoomiyaha Gobolka Benaadir (Eng. Yarisow) ayaa warqad uu soo saaray si rasmi ah ugu joojiyey dhismaha ka socday dhulka danta guud ee Biyaaso Liibaro ee ku yaalla aagga Ceel Gaabta ee degmada Xamar jajab.

          Waxaa kaloo jirtay in Duqa magaalada Muqdisho uu warqad rasmi ah ku joojiyey 5tii February 2018 dhismaha ka socday dhulka ka soo horjeeda Dekedda magaalada Muqdisho ee degmada XamarJabab, kadib markii uu warbixin ka dhageystay waaxda dhul bixinta ee gobolka Benaadir.

RA’IISUL WASAARE KHAYRE OO LA KULMAY SAFIIRKA FARANSA U QAABILSAN SOOMAALIYA..

          Ra’iisul Wasaaraha Xukuumadda Federaalka Soomaaliya Mudane Xasan Cali Khayre oo ay waheliyaan Ra’iisul Wasaare ku xigeenka dalka iyo Wasiir ku xigeenka Wasaaradda Arrimaha Dibadda ee Soomaaliya, ayaa shalay kulan la yeeshay Safiirka dalka Faransa u qaabilsan Soomaaliya, Antoine SIVAN iyo wafti uu hogaaminiyo.

          Kulankan oo ka qabsoomay xafiiska Ra’iisul Wasaaraha Soomaaliya, ayay mas’uuliyiintu ka wada hadlayn xoojinta iyo wadashaqaynta labada dawladood iyo sidii uu wadanka Faranse uga qayb qaadan lahaa xasilinta amanigga, kobcinta dhaqaalaha dalka iyo horumarka guud ee wadanka.

          Safiirka Faranse u qaabsilsan arrimaha Soomaaliya Antoine SIVAN ayaa dawladda ku bogaadiyay hourmarka ay samaysay mudadii ay jirtay iyo sida ay ugu dadalayso in laga cafiyo daymaha mudada dheer lagu leeyahay Soomaaliya, taas oo u sahlaysa in ay la jaanqaado wadamada horumaray hadii laga cafiyo daymaha.

          Ra’iisul Wasaaraha Soomaaliya Xasan Cali Khayre ayaa tilmaamay in xukumadiisu ay si wayn uga shaqaysay xoojinta iyo dardargalinta arrimo dhowr ah oo ay ka mid yhiin Maaliyadda, Amnigg,a la dagaalanka musuqmaasuqa iyo ciribtirka argagaxisada.

          "Soomaaliya uma baahana oo kaliya in lagu taageero lacag, balse waxay doonaysaa in lagala shaqayo sidii looga dhaafi lahaa daymaha. Sidoo kalena shacabkeeda loogu abuuri lahaa adeegyo Caafimaad, Waxbarasho iyo jidad casriya”. Ayuu yiri Ra’iisul Wasaare Khayre.

          Ra’iisul Wasaare Khayre ayaa sheegay in dawladda ay ku dadalayso habkii looga cafin lahaa daymaha lagu leeyahay dalka,waxuuna u soo jeediyay in dalka Faransa uu qayb muhiim ah ka qaato sidii dunidda loo tusi lahaa soo kabashada iyo amniga ka jirta Soomaaliya, si uu caalamku uu maalgashi uga samaysto Soomaaliya.

WASIIRKA HOWLAHA GUUD OO ISAGA HARAY U TARTAMIDA KURSI KA BANAAN GOLAHA SHACABKA

          Wararka naga soo gaaraya Magaalada Kismaayo ee Xarunta gobolka Jubbada Hoose ayaa waxa ay sheegayaan in Wasiirka Howlaha Guud iyo Guryenta Soomaaliya uu isaga tegay  u tartamida Xubin ka banaan Golaha Shacabka.

          Khamiista Maanta ah ayaa la filayaa in ay Kismaayo ka dhacdo doorashada oo ay ku tartami doonaan Shaqsi malxiis ah iyo Walaalka Marxuum Cabaas Siraaji oo booskaasi ka geeriyooday kadib markii tartankas uu ka haray Wasiir Saadaq C/llaahi Cabdi.

          Wararka ay Dalsan heshay ayaa waxa ay sheegayaan in Wasiir Saadaq C/llaahi Cabdi uu tartankaas isaga haray kadib cadaadis soo wajahay sida ay Dalsan u xAqiijiyeen ilo xogogaal ah.

          Xubinta Xildhibaanimo ee uu  ka geeriyooday Marxuum Cabaas Siraaji oo la dilay 3dii bishii May ee  Sanadkii tegay ee 2017 ayaa ka mid aheyd Xubnaha ka banaan Golaha Shacabka.

DOWLADA KENYA OO SHEEGTAY IN MUWAADINIIN KENYAN AH AY ALSHABAAB KU DILEEN SOOMAALIYA

          Dowladda Kenya ayaa shaacisay in ururka AlShabaab ay ku dileen muwaadiniin Kenyan ah deegaano ka mid ah gobolka Sh/hoose. Warkan ka soo baxay dowlada Kenya ayaa sidoo kale lagu sheegay in raggan loogaga shakiyay inay u basaasayeen ciidamada Kenya.

          Labada ruux oo lagu diley deegaanka Kuunya Barrow ayaa waxay ka soo jeedeen gobolka Marsabit iyadoo magacyadooda lagu kala sheegay Xasan Yuusuf iyo Maxamed Xasan.

          Dilkan ayaa la sheegay inuu dhacay 12kii bishan iyadoo Alshabab ay ku eedeeyeen raggan inay la shaqeynta ciidanka Kenya.

          Sidoo kale dowlada Kenya ayaa waxa ay sheegtay in tiro kabadan labaatan ruux oo Kenyan ay Alshabeen ku dileen gudaha dalka Soomaaliye.

          Warbixin ay soo saartay dowlada Kenya ayaa waxaa ay ku sheegtay magacyada qaar kamid ah ragga ay dileen Alshabaab waxaana ka mid ahaa Jared Mokaya, Faraj Abdulmajid, Ahmed Yusuf, Ahmed Nur, Abdi Osoble, Abdullah Talal iyo Hashim Othman.

          Dowladda Kenya sheegtay in xukunka raggaas ay gaartay Maxkamad Alshabaab ay leeyihiin oo ku taalla degmada Jamaame ee Gobolka Jubada dhexe.

MUWAADIN SOOMAALIYEED OO LAGU EEDEEYAY DILKA BOQORADDA UK IYO RA’IISUL WASAARIHII HORE EE INGIRIISKA DAVID CAMIROON.

          Muwaadin Soomaaliyeed oo lagu magacaabo Aweys Shiikhey ayaa la sheegay in la xiray isagoo doonaya inuu ku Biiro ururka Daacish, kadib markii dayn ka qaatay Bangi lacag dhan 10,000 oo Euro oo u dhiganta 12,362 Dolarka Mareeykanka ah.

          Wargayska Telegraph ee ingiriiska ka soo baxa oo baahiyay dhacdadaasi ayaa sidoo kale sheegay in Muwaadinkaasi Soomaaliga ah uu Bangiga u sheegay inuu Lacagtasi u doonayo inuu ku guursado, hase yeeshee la ogaaday inuu rabo inuu ugu safro Siiriya si uu ururka Daacish ugu Biiro.

          Muwaadinkaan Soomaaliga ah ayaa ah darawal Gaari Badeecooyin daabula oo da’diisu tahay 38jir, wuxuuna ninkaasi Soomaaliga ah beeniniyay inuu diyaarinayay weerarro Argagixiso iyo in uu Dad kale kala dooday Dilka Boqoradda UK iyo Ra’iisul wasaarihii hore ee ingiriiska David Camiroon.

          Xeer ilaalinta UK ayaa sheegay inuu ninkaasi ka hadlay in la weeraro Yahuuda Dagan Degmadda Stamford Hill ee ku taalla Waqooyi bari Magaaladda London ee Caasimadda Ingriiska iyo in Qori AK47 ah lagu Beegsado marka taagerasyaasha kubadda Cagtu ka soo Baxaan Garoonka Tottenham Hotspur.

          Mr. Waeys ayaa la sheegay inuu heyto Dhalashadda Netherland wuxuuna leeyahay labo xaas oo kala Dagan Netherland iyo Kenya iyo Caruur, iyadoo Muwaadinkaas Soomaaliga ah la sheegay in 23kii may ee Sanadkii tagay laga qabtay Garoon Caalami ah oo ku yaala Magaalada London.

          Barnaby Jameson oo ah Dacwad ooge ayaa sheegay in ujeedo kasta oo uu lahaa Aweys ay ka dhex muuqatay Xagjirnimo, iyadoo la sheegay in ninkaasi uu tashkiiliyay Muwaadin Soomaaliyeed oo ku noolaa wadanka Kenya magaciisana lagu sheegay C/Raxmaan Idris Xasan sida lagu ogaaday Qoraalo ay isku dhaafsadeen baraha Bulshada.

          Dhanka kale Dacwad oogaha ayaa Maxkamad ka hor aqriyay Qoraal uu soo qoray C/Raxmaan Idiris Xasan oo u Qornaa sidan: " Ilaahey ha kugu darajeeyo Dilka David Camiroon iyo Haweyneyda Duqda ah ee Elizabeth.

SHIR KU SAABSAN DOORKA HAWEENKA EE MAAMUL WANAAGGA IYO LADAGAALLANKA MUSUQ MAASUQA.

          Shir ku saabsan doorka haweenka ee sare u qaaddidda Maamul wanaagga iyo Ladagaallanka Musuq maasuqa oo ay soo agaasintay hay’adda Astaynta Maamul wanaagga iyo Ladagaallanka Musuq maasuqa dowladda Puntland ayaa shalay lagu qabtay Garoowe.

          Shirka ayaa waxaa ka soo qeyb galay Wasiirka Wasaaradda Haweenka iyo Horumarinta Arrimaha Qoyska dowladda Puntland Marwo. Maryan Axmed Cali,Sii hayaha Wasiirka Wasaaradda Beeraha iyo Waraabka Xukuumadda Puntland Marwo. Siciido Xuseen Cali, Guddoomiyaha Ururweynaha Haweenka sagaalka gobol ee Puntland Marwo. Khadro Warsame Jaamac, gabdhaha aqoonyahannada ah ee Wax ka barta Jaamacadaha gudaha iyo marti sharaf kale oo haween u badan.

          Agaasimaha hay’adda Astaynta Maamul wanaagga iyo Ladagaallanka Musuq maasuqa dowladda Puntland Mudane. Cabdiraxmaan Cali Guureeye oo ugu horrayn hadal ka jeediyay shirkaan ayaa faahfaahiyay ujeedka ay shirkaan ka leeyihiin,isagoo sheegay in haweenku yihiin udub dhexaadka bulshada,sidaasi darteedna ay kaalinta kowaad kaga jiraan ladagaallanka Musuq maasuqa iyo sare u qaadidda Maamul wanaagga.

          Mr.Guureeye ayaa sidoo kale sheegay in dhowaan madaxweynaha dowladda Puntland magacaabay guddi loo xil saaray cabashooyinka dadweynaha ee ku aaddan shaqaaleysiinta,guddigaasi oo wax ka qabanaya musuq maasuqa iyo nin jeclaysiga ay dadweynuhu ka soo cawdaan,gaar ahaanna shaqooyinka laga raadsado hay’adaha dowladda.

          Agaasimaha ayaa rajo wanaagsan ka muujiyay in guddigaan uu madaxda u yahay ee loo xilsaaray cabashooyinka dadweynaha in shaqadoodu noqoto mid taabbagesha.

          Dhinaca kale Sii hayaha Wasiirka Wasaaradda Beeraha iyo Waraabka Xukuumadda Puntland Marwo. Siciido Xuseen Cali iyo Guddoomiyaha Ururweynaha Haweenka sagaalka gobol ee Puntland Marwo. Khadro Warsame Jaamac oo shirkaan ka hadlay ayaa qiray in haweenku ay yihiin kuwa ugu Musuq maasuqa yar kolkii mas’uuliyad loo dhiibo,waxayna haweenka Soomaaliyeed ugu baaqeen in ay u kacaan sidii aafada Musuq maasuqa dalka looga ciribtiri lahaa,islamarkaana sare loogu qaadi lahaa Maamul wanaagga.

          Wasiirka Wasaaradda Haweenka iyo Horumarinta Arrimaha Qoyska dowladda Puntland Marwo. Maryan Axmed Cali oo shirka soo xirtay ayaa sheegtay in haweenku ay aad uga Musuq maasuq yar yihiin ragga,maadaama ay ka beer jilicsan yihiin,laakii aan gebi ahaanba la oron karin waa ka maran yihiin.

          Marwo. Maryan Axmed Cali ayaa haweenka reer Puntland ku boorrisay in ay dadaal dheer ku bixiyaan sidii looga takhalusi lahaa cudurka halista ah ee Musuq maasuqa,maadaama ay hooyadu tahay asaaska bulshada.

BOOLISKA MAAMULKA GALMUDUG OO KU DHAWAAQAY SHAQO JOOJIN

          Ku dhawaad 600 oo Askari oo ka tirsan Ciidamada Booliska ee maamulka Galmudug ayaa shalay sameeyay shaqo joojin.

          Waxaana la sheegay in Ciidamadan oo gaaraya 575 Askari aysan shalay soo shaqo galin, kuwaas oo ka howlgalayay illaa iyo 17 xarumood oo ku yaalla deegaanada maamulkaasi.

          War Saxaafadeed ay si wadajir ah u soo saareen Ciidamadaasi ayaa waxa ay ku sheegeen in ka cabanayaan mushaar la’aan iyo daruufo kale.

          Waxaan ay ugu baaqeen madaxda Galmudug iyo kuwa Dowladda Federaalka Soomaaliya in ay wax ka qabtaan cabashadooda.

XFS OO SHEEGTAY IN BIYO LA’AAN AY KA JIRTO GOBOLLADA DALKA

          Wasiirka Tamarta iyo Biyaha Xukuumadda Federaalka Soomaaliya Saalim Caliyow Ibrow ayaa qeylo dhaan ka muujiyay Biyo la’aan ka jirta goboollada dalka.

          Wasiirka ayaa sheegay in ay gureen Wabiyadii dalka, islamarkaana dadku ay isticmaalayaan xilligan Biyo wasaqeysan , taasi oo sababi karto caafimaad darro.

          Sidoo kale wasiirka Tamarta iyo Biyaha Soomaaliya ayaa xusay in Biya la’aantaasi ay ka jirto dhammaan deegaanada maamul goboleedyada dalka.

          Ugu dambeyn wasiirka ayaa ugu baaqay hay’adaha gargaarka in ay caawinaad deg deg ah ay u fidiyaan dadkaasi, islamarkaana ay ka qeyb qaataan mashaariicyo Ceelal Biyood loogu qodayo dadkaasi.

SOMALILAND OO LAGU WAREEJIYAY QAYB KA MID AH ASKARTII KHAATUMO

          Somaliland ayaa maamulka Khaatumo kala wareegtay labo boqol oo askari iyo shan gaari oo kuwa dagaalka ah, arrintan ayaa ka dhacday magaalada Ballicad oo ka tirsan gobolka Cayn.

          Munaasabadda ciidanka lagu wareejinayay waxaa ku sugnaa mas’uuliyiin ka socday maamulka Khaatuma oo ay ka mid ahaayeen Wasiirka Amniga maamulkaasi Keyse Cabdi Yuusuf iyo Wasiirka Warfaafinta Axmed Xaaji Cali.

          Mas’uuliyiintan ayaa waxaa ay sheegeen in ciidankaan ay si hordhac ah ugu wareejinayaan Somaliland taasina ay qayb ka tahay heshiis ay horey magaalada Caynaba ugu kala saxiixdeen Somaliland iyo Khaatumo.

          Ugu horreyn waxaa meesha ka hadlay Wasiirka Amniga Khaatumo mudane Keyse Cabdi Yuusuf, waxaa uuna sheegay in uu heshiiskan tabagalay, maadaama qodobbo ka mid ah kuwii lagu heshiiyey ay dhaqangaleen waxa uuna yiri "Arrinta shalay aan iskugu nimid oo inteenaan na kulmisay waa heshiiskii Caynaba ka dhacay, ayna ku heshiiyeen Somaliland iyo Khaatumo, heshiiskaas qodobbo ayuu lahaa, fulin ayuu u baahnaa in la fuliyana waa lagama maarmaan, shalay lama heshiinin [ee] horaa loo heshiiyey ".

          Wasiirka Warfaafinta Khaatumo mudane Axmed Xaaji Cali oo isna hadlay waxa uu yiri " Qodobkii ugu horreeyay oo hirgalay waxa uu ahaa in xabbadjoojin la sameeyo nabadna la qaato, waayo haddeysan nabaddu dhicin wadahadal ma soconayo, ilaa iyo markii uu heshiiskan dhacay dagaal ma uusan dhicin waxaadna ku fadhideen heshiiskaas iyo meesha uu ku dambayn doono”.

          Taliyaha ciidamada lagu wareejiyey Gaashaanle Sare Cabdullaahi Dheere ayaa uga mahadceliyey maamulka Khaatumo sida ay u fuliyeen heshiisyadii la galay  waxa uuna yiri " Saacaddaaas laga bilaabo waxaad ka mid tihiin ciidanka Qaranka, askari kasta waxa uu leeyahay xaquuqda uu qaranka ku leeyahay, waajibka aad leedihiin ayaa idinkana la idin ka rabaa oo ah midka ciidannimo”.

          Ciidamadan ka tirsan Khaatumo ee ku biiray Somaliland ayaa waxa ay qayb ka yihiin heshiis ay horay magaalada Cayn ugu kala saxiixdeen labada dhinac.

GUDDOOMIYAHA GOBOLKA BANAADIR OO XAFLAD SOO DHAWEYN AH OO LOO SAMEEYAY ..

          Bulshada ku nool Gobolka Banaadir ayaa shalay xaflad qado iyo soo dhaweyn u sameeyey Guddoomiyaha Gobolka Banaadir ahna Duqa magaalda Muqdisho Mudane Cabdiraxmaan Cumar Cusmaan (Eng Yariisow) iyo Maamulkiisa, iyadoo ay ka qeyb galeen xubno kala duwan.

          Xafladaan ayaa waxa ka soo qeyb galay Ra’isulwasaarihii hore ee Soomaaliya Cali Maxamed Geedi, Xildhibaanada labada Aqal ee dowladda Soomaaliya, Wasiiro, Odayasha Dhaqanka Soomaaliyeed iyo marti sharaf kale.

          Guddoomiyaha Gobolka Banaadir ahna Duqa Muqdisho Mudane Cabdiraxmaan Cumar Cusmaan (Eng Yariisow) oo ka hadlay xafladda ayaa uga mahadceliyay bulshada Gobolka Banaadir sida ay u garab taaganyihiin Maamulkiisa.

MAXKAMAD LA SOO TAAGAY SHALAY AHED TAMIMI OO LOO HAYSTO INAY DHARBAAXDAY ASKARI YUHUUD AH

          Maxkamad Milatari oo albabada loo xirtey ayaa la soo taagay shalay gabadha caanka noqotay ee Ahed Tamimi iyo hooyadeed.

          Ahed Tamimi oo 17 sano jir ah ayaa loo haystaa illaa 12 dambi oo ay ka mid yihiin weerar ay ku qaaday askar iyo kicin rabshado. Haddii lagu helo dambiyada lagu soo oogay ayay xabsi dheer lagu xukumi karaa gabadhan.

          Shacabka reer Falastiin ayaa waxa ay u tahay Ms Tamimi astaan dhaqdhaqaaqa loogaga soo horjeedo Israel halka dad badan oo Israel ah ay u tahay gabar rabsho badan oo raadineysa in ay caan noqoto.

          Ms Tamimi ayaa la keenay maxkamada Milatari shalay iyadoo gacmaha iyo lugahaba ka katiinadeysan. Bassem oo ah Tamimi aabaheed ayaa ku sugayay qolka maxkamada markii ay timidna waxa uu ku dhiirigeliyay inay is adkeyso.

          Weriyaashii sugayay inay warbixino ka diyaariyaan maxkamadan ayaa lagu amray inay ka baxaan maxkamada. Qareenka difaacayay Axed Gaby Lasky ayaa sheegay in maxkamada ay sameysay wixii u wanaagsanaa oo aysan sameyn wixii u fiicnaa Axed Tamimi.

          Wakaalada wararka AFP ayaa ka soo xigatay ms Lasky in ay ku dooday in aysan maxkamadu socon karin maadaama degenaanshaha Daanta Galbeed iyo maxkamadaba ay tahay sharci darro.

          Ugu dambeyntii dhagaysiga maxkamada ayaa dib loo dhigey illaa iyo bisha March ee soo socota iyadoo ay tahay markii labaad oo dib loo dhigayo qaadista dacwada Ms Tamimi.

          Ahed Tamimi ayaa markeedii ugu horeysay waxaa lagu arkay muuqaal video ah iyadoo la dagaalamaysa askari Yuhuudi ah.

          Waxayna hore dhowr jeer uga qeybgashay banaanbaxyo loogaga soo horjeedo maamulka Israel. Madaxweynaha Turkiga Erdogan ayaa amaanay dhaqanka gabadhan waxana uu ugu deeqey Billad geesi.

DHACDA TAARIIKHEED KOOBAN: 3DII SHILLIN EE SYL.

          Isticmaarkii Ingriiska ayaa waxa uu soo jeediyay in xisbiyada gobanima doonka la diiwaan galiyo, isaga oo ka shakisnaa soo noqoshada Talyaanig.

          Dhalinyaradii SYL oo wadaada xer ah u badnaa ma heli Karin 3 da shillin ee diiwaan galinta,taa oo berigaa aheed lacag badan.

          Md. Calasoow gocoso oo ka mid ahaa xoogsatada magaalada ayaa yiri: anigaa bixinaya ,wanna intii ii hartay ee aan islahaa ilmuhu hakaa dhaxleen,wanna bixiyay.

          Waxaa laga baqayay in uu ingriisku khayaano wato oo qofkii taga xafiiska diiwaan galinta la xirayo.Md. Xussein Kulmiye Afrax oo markaa ahaa ,asgari police ah ayaa yiri: anigaa sharciga wax ma aqaan, haba la i xiro ama ciidanka ha leeyga saaro,wuuna soo diiwaan galiyay.

          Calasoow Gocoso, oo xuriyada kadib ahaa shaqaalahii dowlada Hoose ee xamar, illaa uu howlgab ka noqday.

          Nasiib daro,Md. Calasoow isaga oo 95 sanno jir ah,oo muddo sariir saaraa ayaa gurigiisa waxaa yimid dalinyaro colla oo aana Qabiil raadinee, markii ay guriga qof kale ka waayeen, ayeey 95 jirkii Md. Gocoso sariirtiisa Ku dul dileen.

          ALLA ha u wada naxariisto intii gobanimada xoog, xoolo, tallo, duco, fekerba ku darsatay.

          FG: haddii aad heli karto sawirka Md. Gocoso ii soo dir,wixii aan ka qaldayna ka sax.fekerkaaga xor ayaad u tahay.Qore: Yahya Amir.

BOGGA CAYAARAHA

KOOXDEE AYAA KU GUULEYSAN DOONTA XILI CIYAAREEDKAN CHAMPIONS LEAGUE-GA? WAXAA KA JAWAABAYA DIETMAR HAMANN.

          Waxaa jiray xiliyadii lasoo dhaafay hadalo badan ee ku saabsan in kooxda Manchester City ay xili ciyaareedkan qaadaneyso qaab ciya-areed cajiib ah, waxayna falanqeeya-yaasha iyo indha indheyneyaashu kubada cagta ay u arkaan inay tahay musharaxa ugu fiican ee Champions League xilli ciyaareedkan ku guule-ysan kara.

          Manchester City ayaa shaqadii ugu badnayd sii qabsatay kulankii lugtii hore ee UEFA Champions Le-ague-ga wareegiisa 16ka kooxood ka-dib markii ay 4-0 ku soo xaaqday kooxda ree Switzeraland ee FC Basel. Kooxda Guardiola ayaa muujisay sida ay xili ciyaareedkan halis wayn ugu tahay koox kasta oo ay kaga hor timid afarta tartan ee ay qaybta ka tahay.

          Laakiin laacibka reer Germany iyo kooxda Liverpool Dietmar Hamann ayaa wuxuu xambaarsan yahay ra’ayi ka duwan dadka kale ee ku aadan arintan wuxuuna yidhi: "Real Madrid waxay u baahneed kaliya inay hour-mar ku sameyso safka kooxdeeda su-uqii xagaaga ee lasoo dhaafay, balse ma aysan sameynin, sidaasi darteed waxaan u maleynayaa in PSG ay qaadaneyso qaab ciyaareed cajiib ah, waxayna u badan tahay in ay Los Bla-ncos ka cidhib tiri doonto xili ciyaar-eedkan Champions League-ga”.

          Dietmar Hamann ayaa wuxuu hadalkiisa intaa kusii daray: "Marka ay tahay ka hadalka arinta Manchester City waxaa suuragal ah in koobka Champions League-ga ay ku guuleysan doonto sanad ama laba sano kadib, balse ilama ahan in ay xili ciyaareedkan sidaas sameyn doonto”.

          Laakiin Hamann oo aaminsan in ay Barcelona xili ciyaareedkan furs-ad u heli karto ku guuleysiga Cham-pions League-ga ayaa wuxuu yidhi: "Barcelona waxay fursad weyn xili ciyaareedkan u heysataa inay ku guul-eysato labo ama hal koob ee lagu daray Champions League-ga marka loo eego awooda ciyaareed ay bixi-nayaan xidigaha haatan ku sugan Cump Nou, waxay u badan tahay san-adan inay ku guuleysan karaan Champions League-ga, sababtoo ah Lionel Messi wuxuu bixinayaa qaab ciyaareed heer saro ee cajiib ah”.

MAN UNITED OO AC MILAN U SHEEGTAY HALKA WADO EE AY KU HELI KARTO SAXIIXA ANDRE HERRERA

          Kooxda Man United ayaa lagu soo waramayaa in ay Dhigeeda Ac Milan ku war galisay in ay diyaar u tahay in ay ka iibiso xiddiga khadka dhexe ee Andre Herrera marka la gaaro dhamaadka xilli ciyaareedkan ee uu suuqa kala iibsigu dib u furmo xagaaga.

          Laakiin Man United ayaa hal shardi hor dhigtay kooxda Ac Milan si ay u hesho xiddiga khadka dhexe ee 28 jirk ah ee aan booska joogtada ah ka haysan kooxda Man United.

          Wararka ayaa sheegaya in ay kooxda Man United u sheegtay Ac Milan in ay miiska saarto lacag dhan 35 milyan oo euro si ay u hesho xiddigii hore ee kooxda Atletico Bil-bao.

          Herrera ayaa Man United ku soo biiray sanadkii 2014 waxana uu xilli ciyaareedkii hore ahaa xiddigaha ugu fiican kooxda Man United laakiin xiddiga ayaa xilli ciyaareedka ku dhibaatooday in uu boos joogto ah ka helo Man United.

          Ac Milan ayaa doonaysa in ay xiddigan hesho xagaaga si ay ugu xoojiso kooxdeeda iyada oo waliba xiddiga u balan qaaday boos joogto ah oo xilli ciyaareedka dambe ah

ALEXANDRE LACAZETTE OO DHAAWAC KU SEEGI DOONO GAROOMADA MUDO LIX ISBUUC AH

          Weeraryahanka Arsenal Alexa-ndre Lacazette ayaa garoomada ka maqnaan doona ilaa lix isbuuc ka dib markii qaliin looga sameeyay jilibka, sida ay xaqiijisay kooxda.

          Weeraryahanka reer France Lacazette ayaa qalliin looga same-yay jilibka bidix subaxnimadii Talaadada, kaasoo 26 jirkaan sabab u noqonaya in uu seego garoomada ugu yaraan afar isbuuc.

          Lacazette ayaa bedel ku soo galay guuldaradii Gunners ka soo ga-artay Tottenham Hotspur Isbuucii lasoo dhaafay, ka dib markii tababare Arsene Wenger uu soo doortay Pie-rre-Emerick Aubameyang shaxda ko-waad ee kulankaa.

          ciyaaryahanka reer France ay-aa haatan ka maqnaan doona labada kulan ee 32ka kulan ee ugu danbeeya ee ay la ciyaarayaan Ostersund.

    &