Sida ay sheegayaan wararka inaga soo gaaraya deegaanka Jilib Marka oo ka tirsan Gobolka Shabeellaha hoose Kooxo hubaysan ayaa deegaankaasi waxa ay ku dileen nin darawal ahaa oo waday gaari Homy/caasi oo ku sii jeeday Magaalada Muqdisho. Dilka Ninkaan Darawalka ah ayaa yimid kadib markii Raggan hubaysan ay rasaas huwiyeen gaarigii uu waday Darawalka, rasaastaasi oo ku dhacday ninka Darawalka ah, kadibna durba halkaasi ku geeriyooday.

Lama oga sababta rasmiga ah ee ragga hubaysan ay rasaasta ugu fureen gaariga, hayeeshe markii ay dileen ninkii darawalka ahaa ayeey ka baxsadeen goobta iyaga oo aanan waxba yeelin dadkii shacabka ahaa ee gaariga saarnaa.

Nin ka mid ah dadkii saarnaa Baabuurka oo ka sheekeeyay sida ay wax u dhaceen, ayaa tilmaamay iyaga oo ku guda jira Safarkooda mar kaliya inay maqleen dhawaqa rasaas soo dhacday oo durba ku dhacday Darawalkii Baabuurka.

"Annaga gaariga ayaan saarneen, waxaan usoo soconnay magaalada Muqdisho, rasaas ayaan ka war helnay, darwalka ayeeyna ku dhacday, Meydkii Marka ayaan usoo qaadnay, halkaas ayaana lagu aasay’ ayuu yiri Goobjoogaha.

Burcad hubaysan ayaa taag-taagan wadooyinka Gobolka Shabeellaha hoose, kuwaasi oo dhibaatooyin u geysta dadka wadooyinka ku safra.

xigasho:- dhacdo.com