Qaar ka mid ah Xildhibaanada Baarlamaanka ayaa ka hor-yimid in baaritaan lagu sameeyo, iyagoo ku dooday inay leeyihiin xasaanad, isla markaana ay tahay mid xadgudub ku ah dastuurka, kaasoo dhigaya in Xildhibaanka la baari karin, gurigiisana aanay Ciidamo geli karin.

Wasiirka Amniga gudaha C/risaaq Cumar Maxamed oo todobaadkii hore su’aalo uga jawaabay Xildhibaanada ayaa sheegay in aanay jirin amar ka soo baxay oo lagu baarayo Xildhibaanada.

Taliyaha Hey’adda Nabadsugida iyo Sirdoonka Qaranka Jen. C/raxmaan Tuur Yare ayaa todobaadkii hore mar uu ka soo degayay garoonka diyaaradaha waxaa uu maray baaritaanada garoonka, isla markaana kabaha iyo suunka siibaya, si uu ugu dhiira geliyo mas’uuliyiinta dowladda inay maraan baaritaanada.

Weerarkii Diyaaradda Daallo kadib waxaa la adkeeyay ammaanka garoonka diyaaradaha Aadan Cadde, iyadoo shacab iyo Mas’uulna si isku mid ah loo baarayo hadii uu ka dhoofayo garoonka iyo hadii uu ka soo degayo.