Kulanka oo ka dhacay magaalada Muqdisho ayaa waxaa ka qeyb galay Taliyaha Ciidanka Asluubta Soomaaliyeed, Sarreeye Guud Maxamed Sheekh Xasan Xamuud iyo Safiirka Dowladda Shiinaha u fadhiya Soomaaliya Wang Yu.

Labada dhinac ayaa ka wada hadlay xoojinta xiriirka labada dal, gaar ahaan sidii Dowladda Shiinaha uga qeyb qaadan lahayd casriyeynta iyo horumarinta hay’adaha asluubta Soomaaliya.

Safiirka Shiinaha ayaa sheegay in dalkiisu uu bixin doono qalab casri ah oo lagu horumarinayo ammaanka xabsiyada iyo adeegyada ay bixiyaan xarumaha lagu hayo maxaabiista.

Taliyaha Ciidanka Asluubta Soomaaliyeed ayaa dhankiisa uga mahadceliyay Dowladda Shiinaha taageerada joogtada ah ee ay siiso shacabka Soomaaliyeed iyo hay’adaha dowladda.

Mas’uuliyiinta labada dhinac ayaa ugu dambeyn isku raacay in la dedejiyo hirgelinta qodobadii laga wada hadlay, si loo gaaro horumar muuqda oo laga sameeyo xarumaha asluubta dalka.