Madaxweyne Afwerki wuxuu sheegay in Eritrea aysan ka welwelin ajandaha dagaal ee Itoobiya, inkastoo ay ku faanayso hubka ay urursatay iyo diyaarado drone ah. Wuxuu caddeeyay in Eritrea aysan rabin dagaal, balse haddii lagu qasbo ay si buuxda isu difaaci karto, islamarkaana ay garanayso qaabka iyo xeeladaha difaaca dalkooda. 

Afwerki wuxuu ku eedeeyay xisbiga Barwaaqo ee Itoobiya in ajandahooda ay dabada ka riixayaan xoogag shisheeye oo doonaya in colaado ka aloosaan gobolka, gaar ahaan khilaafaadka ka taagan Suudaan.

Wuxuu yiri: "Itoobiya waxaa majaraha u haya kuwa Suudaan qaska ka wadda, ee gobolkana doonnaya in ay xasilooni darro ka abuuraan. Anagu waan naqaana sida loo difaaco dalkeena.”

Sidoo kale, Madaxweynaha Eritrea wuxuu ku eedeeyay Imaaraadka Carabta inuu yahay jilaaga ugu weyn ee xasilooni darrada ka abuurey Suudaan, isagoo isku dayaya inuu xiisad ka abuuro Geeska Afrika, isagoo dabada ka riixaya Itoobiya iyo kooxo kale si loo sii huriyo khilaafaadka gobolka.

Afwerki wuxuu xusay in Badda Cas iyo Geeska Afrika ay leeyihiin muhiimad istiraatijiyadeed oo weyn, lagama maarmaan u ah ilaalinta marin-biyoodka, ka hortagga burcad-badeedda, iyo amniga gobolka. Wuxuu caddeeyay in iskaashiga dalalka xeebaha leh, sida Sacuudi Carabiya iyo Masar, uu yahay furaha xasilloonida iyo horumar waara.

Afwerki wuxuu carrabka ku adkeeyay in horumarka Eritrea iyo gobolka uu ku xiran yahay nabad iyo iskaashi goboleed, isagoo tilmaamay in Eritrea ay qorsheyneyso mashaariic dhinaca badda, tamarta, iyo kaabayaasha dhaqaalaha si loo xoojiyo horumarka mustaqbalka.