Magaalada Muqdisho waxaa ka dhaqan galay go'aanadii laga soo saaray dhinaca amniga, iyadoo maamulka gobolka Banaadir uu bilaabay howlgallo nooc cusub ah oo fara badan isla markaana 17-ka degmo ee gobolka laga qaaday olole nooc cusub ah.

Dhammaan isgoysyada magaalada Muqdisho waxaa lagu daadiyay ciidamo kala duwan oo socda maamulka gobolka Banaadir, kuwaasi oo iyagu baaraya gawaarida isla markaana su’aalo lagu weydiinayo wadaha gaariga, iyadoo la qabanay gaarigii aanu wadan ninkii iska lahaa.

Howlgaladaan ka socda magaalada Muqdisho oo ah kuwii ugu ballaarnaa isla markaana ka duwan howlgaladii hore, ayaa waxaa lagu diiwaan gelinayaa guryaha ku yaala 17-ka degmo, iyadoo milkiilayaasha guryaha loo sheegay in gurigii lagu helo falal amniga ka dhan ah lala wareegayo, isla markaana laga qaadayo tallaabooyin kale oo aan la shaacin.

Tallaabooyinkaan dhinaca amniga loo qaaday ayaan la ogeyn waxa ay ka bedeli karto nabadgelyada magaalada Muqdisho, iyadoo tallaabooyinkani dadka qaarkii ay sheegeen inay yareyneyso falalkii ka dhici jiray, isla markaana kor u qaadeysa xasiloonida iyo degenaanshaha caasimada dalka ee Muqdisho.