Saqdii dhexe ee xalay ayaa mar qura waxaa xaafada If iyo Aakhiro ee Degmada Afgooye laga maqlay jugta Qarax xoogan oo dadka Xaafada degan ay aad u dareemeen, waxaana Qaraxaasi uu ka dhacay guri ay deganaayeen ciidan Dowladda ka tirsan iyo masuul ka tirsanaa Maamulka Degmada Afgooye. Qaraxan oo loo maleynaayo noociisa in uu ahaa miino lagu xiray guriga ayaa waxaa ka dhashay Khasaaro dhimasho iyo dhaawac ah.

Inta la xaqiijiyay labo Askari ayaa qaraxaasi ku geeriyootay halka ay ku dhaawacmeen saddex ruux oo ciidan iyo shacab isugu jira intaba.

Guriga qaraxa uu ka dhacay ayaa waxaa deganaa Guddoomiye ku xigeenkii hore ee Maamulka Degmada Afgooye, inkastoo aysan waxba soo gaarin isaga.

Ciidamada Dowladda ayaa saaka Degmada Afgooye waxa ay ka sameeyeen howlgalo ay ku sugayaan ammaanka Degmada Afgooye, laguna raadinaayo dadkii qaraxaasi ka dambeeyay.

Maamulka Degmada Afgooye weli kama aysan hadlin Qaraxaan ka dhacay Degmadaasi, balse dadka deegaanka ayaa Warbaahinta gudaha u xaqiijiyay in cabsi xoogan uu ku beeray jugta Qaraxa xoogan ee xalay Degmada Afgooye ka dhacay.

Shabaab ayaa inta badan Qaraxyada miinooyinka iyo Bambada la eegta guryaha ay degan yihiin masuuliyiinta Dowladda iyo ciidamada ka tirsan Dowladda Federalka.