La yaab ma laha, meel walba oo adduunka ka mid ah caddow waa joogaa, xaasid lama waayo, kooxo dulmi isku bahaysta waa la arki jirey waana laga adkaan jirey, ficilka hadda soo cusboonaadey waa feker haraadi ah, xilliga la joogo iyo casriga la marayo lama saanqaadi karo, suurta gal ma aha neceyb qabiil in lagu helo sed bursi iyo xilka Ra’iisul Wasaaraha cusub ee Soomaaliya.

Is urrusi, isku tashi iyo midnimo ummaddeed ayay kalmadaasi u keentay dadkii laga fogeynayay isbadalkii dhacey, kulamo iyo shirar looga arinsanayo faquuqa la keenay ayaa qabsoomay, dood, falanqeyn iyo is-tusaaleyn dheer kadib waxaa lagu heshiiyay in aragti midaysan laga yeesho cid walba oo doonaysa inay marin habaabiso masiirka shacbiga Soomaaliyeed.

Isku dayga ku aadan in beelaha qaarkood laga dheereeyo qaadashada xilka Ra’iisul Wasaaraha waa lagu hungoobayaa, cidna lagama xigo helida xilkaasi, haddii la xisaabtamo isla markaana la qiimeeyo fursadaha jira waxaa muwaadin walba u soo baxaya cidda mudan in la siiyo xilka Wasiirka Koowaad ee Xukuumadda dhalan doonto.

Damac siyaasadeed waa la yeelan karaa, xaqa Qaranka waa loo siman yahay, ma qurux badna in xil dartiis la isu gefo, darajada ALLE ayaa bixiya, caqligu ha shaqeeyo, qalad waa dhacaa waana la saxaa, si looga daawoobo No More Abgaal waxaa haboon in cudur daar laga bixiyo isla markaana la joojiyo hadalada la isku weyn karo.

Soomaaliya waa wallaalo wada dhashay, lama kala maarmo, waa la isu baahan yahay, xilli xasaasi ah ayaa lagu jiraa, waxii dhacay waa dhaceen, is qadarin iyo is xaq dhawr ayaa dadka wada kaafin kara, nin wax noqonaya Alle ayaa og, dadaalku ma reebana, muwaadin kasta rabitaankiisa siyaasadeed waa u madax banaan yahay inuu u halgamo hase yeeshee raali lagama noqon karo in la isku xadgudbo.

—————————————————————–
By;- Shiiqaaloow Xasan