Mar kale taariikhda ayaa dib isku soo celisay. Waqtigaana waxa ay ka dhacday garoonka Coliseum Alfonso Perez. Taageerayaasha kooxda Getafe ayaa ku oorinayay si joogta ah daafaca Barcelona Gerard Pique intii ay socotay kulankii ay Bluagrana xalayto 2-0 ku badisay.

Laga bilaabo markii la yeeriyay seerigii ugu horeysay ee ciyaarta, taageerayaasha kooxda ka dhisan caasimada Spain ayaa ku foorinayay marna ku oorinayay daafaca Barcelona mar walba uu kubada taabto ama mar walba uu ciyaar ka qeyb qaato.

Waxaana ay noqoneysaa wax caado noqotay mar walba oo ay Barcelona ku ciyaareyso meel ka baxsan Camp Nou horyaalka La Liga ama marka uu Pique u ciyaarayo xulka qaranka Spain.

Taas bedelkeeda, taageerayaasha Getafe ayaa u sacabatumay Andres Iniesta markii uu bedel ku soo galay ciyaarta.

Naceybka Pique looga qaaday qeybaha kala duwan ee dalka Spain ayaa la xiriirta ka hadalkiisa gobolka xoriyad doonka ah ee uu ka soo jeedo ee Catalunya.