Askar ayaa sheegay in sanad adag uu ku jiro maadaama uu dhowaan geeriyooday aabihii,xaaskiisana ay xaamilo tahay. Sidoo kale Askar ayaa ku jira xilligii ugu dambeyay ee uu diyaarinayay shahaadaha doctorate jaamacada St.Mary ee Minnesota.

Kursiga xaafada 60B ee Baarlamaanka Minnesota ayaa waxaa horey ugu fadhiday Xildhibaanada Phills Khan oo iyadu kursigaasi ku guuleystay 21 jeer oo hore, balse waxaa markii ugu horeysay haweenaydaasi uga guuleysatay Xisbigeeda Ilhan Cumar oo noqotay gabartii ugu horeysay oo Soomaali iyo Muslim ah oo tartankaasi ku guuleysata.

Doorashada guud ee dhici doonta bisha November ayaa lagu waday in labada xisbi ee Dimuquraadiga iyo Jamhuuriga ku loolamaan kursigaasi waxaana si weyn loo saadaalinayey inay ku guuleysan doonto Murashaxad Ilhaan Cumar maadaama kursigaasi ay had iyo jeer ku guuleystaan xisbiga Dimuquraadiga. Balse Cabdimalik oo isagu ku biiray xisbiga Soomaalida ay ku yartahay ee Jamhuuriga ayaa ugu danbeyntii sheegay inuusan wakhti u heyn inuu loolan la galo Ilhan Cumar oo iyadu taageero xoogleh ku leh magaalada Minneapolis.

Guddoomiyaha ololaha doorashada ee Askar David Pascoe ayaa sheegay in ay dhici karto in qof kale lagu bedelo booskiisa. Hase yeeshee waxaa muuqata in xisbiga Jamhuuriga uusan u tartami doonin kursiga maadaama muddo 22 sanadood ah ay ku guuleysanayeen xisbiga Dimuqraadiga.

Murashaxad Ilhan Cumar ayaa lagu wadaa in bisha November ay taariikh cusub dhigto maadaama ay noqon doonto haweenaydii ugu horeysay oo Muslim ah, Soomaali ah oo kasoo jeeda Afrika oo ku fariisata kursiga Baarlamaanka Minnesota.