Abuu Muscab ayaa sheegay Bartilmaameedka Qaraxaasi inuu ahaa Xarunta Xalane ee Magaalada Muqdisho, sidii loogu talo galayna uu u dhacay.

Ka sokoow hadalka Shabaab ka soo baxay Suxufiyiintii tagay goobta qaraxa uu ka dhacay, ayaa waxa ay xaqiijiyeen in labo Askari oo ka tirsan ciidamada Amisom ay ku dhinteen goobta qaraxa uu ka dhacay oo aheyd afaafka hore ee Irida Xalane.

Khasaaraha ugu badan ee dhimashada wuxuu soo gaaray ciidamo Somali ah oo Ilaalo u ah Xubno ka tirsan Hay’adaha Qaramada Midoobay ee fadhigooda uu yahay Xayndaabka Garoonka Diyaaradaha Aadan Cadde ee Magaalada Muqdisho.

Afhayeenka Amisom ayaa Wakaalada Wararka Somaliyed ee SONNA wuxuu u sheegay in qaraxyada lagu soo weeraray ciidamadooda, laakiin faah-faahinta uu dib ka bixin doono.

Qaraxa Irida Xalane agteeda ka dhacay ayaa loo adeegsaday gaari xamuul ah oo lagu sheegay noociisa inuu yahay DYNA, kaasi oo ah midka dhaliyay Khasaaraha xoogan.

Xayndaabka Garoonka Diyaaradaha Aadan Cadde ee Magaalada Muqdisho, ayaa waxaa degan Hay’ado UN-ka ah iyo xubno kale oo Ajaanib ah, kuwaasi amni ahaan u doorbiday inay halkaasi ku noolaadaan.