Saraakiishaan, ayaa waxaa loo kaxeeyay Gobolka Aegean, iyadoona lagu xiray xabsi ku yaala Magaalada Izmir, waxaana la bilaabay baaritaano wax looga weydiinaayo Saraakiishii kale ee weerarka ku wehlineysay.

Serkan Elci oo ka mid ah Saraakiisha la doon doonaayo, ayaa Khamiistii waxaa uu iska dhiibay Xarunta Booliska ee Magaalada Izmir, waxayna ka dhigan tahay in la qabtay afar ka mid ah Saraakiisha halista gelin gaartay nolosha Madaxweynaha Turkiga iyo qoyskiisuba.

Madaxweynaha iyo qoyskiisa oo 15-kii bishaan fasax u joogay hotel ku yaala Magaalada Marmaris, ayaa lagu soo weeraray diyaarad helicopter ahayd, wax yar uun ka dib markii ay ka taggeen hotelkaasi. Madaxweynaha waxaa uu xilligaa uu u amba baxay Magaalada Istanbul.

Weerarkan oo si dirqi leh uu kaga badbaaday Madaxweynaha Turkiga, ayaa waxaa ku dhimatay laba ka mid ah ilaaladiisii, halka toddobo kalana ay ku dhaawacantay.

Madaxweynaha waxaa uu sheegay haddii 10 illaa 15 daqiiqo uu sii jooggi lahaa hotelka, ay arrintu noqon laheyd laba kala daran midkood, in goobtaasi lagu dili lahaa iyo in sida uu qorshaha labaad ahaa nolosha lagu qaban lahaa.

Laamaha ammaanka, ayaa waxay baadigoob xoog leh ugu jiraan in ka badan toban Sarkaal, oo la rumeysan yahay in Saraakiisha la qabtay ay ku wehlinayeen hawlgalka fashilmay.

Dowladda Turkiga, ayaa Khamiistii ku dhawaaqday in ay laaleyso xeerarka xuquuqda aadanaha ee Yurub, waxayna tani qayb ka tahay xaaladda deg degga ee dalkaasi la geliyay.

Ra’iisal Wasaaraha Turkiga, Binali Yıldırım, ayaa wuxuu ku hanjabay in ay mid mid wadanka kaga sifeeyaan taageerayaasha wadaadka Fethullah Gulen, oo lagu eedeeyay in uu soo qaban qaabiyay afgambiga dhicisoobay.

Midowga Yurub, ayaa waxaa uu walaac xoogan ka muujiyay go’aanka Dowladda Turkiga, isla-markaana ay la socon doonaan arrimaha Turkiga.