Mintidiinta Ururka Al Shabaab oo aad mooddo inayba ka warqabeen dhaq dhaqaaqa Ciidamada Huwanta, ayaa durbaba la wareegay gacan ku haynta Goofgaduud.
Dadka reer Goofgaduud, ayaa waxay kuu sheegayan in Shabaabku ay la wareegen saldhigii Ciidanka Nabad Ilaalinta Midowga Afrika iyo fariisimihii Ciidanka Militariga Somaliya.
Shabaabku waxay kaloo la wareegen Xaruntii Maamulka Deegaanka, waana markii ugu horeysay oo halkaasi ay dib ugu soo laabtaan muddo saddex sano ka badan.
Wax badan lagama garanayo ujeedada ka dambeysa ka soo bixista Ciidamada Huwanta ee Deegaanka Goofgaduud, mana jirto war rasmi ah oo ka soo kala baxay Talisyada Xoogga Dalka iyo Amisom.
Ururka Al Shabaab, ayaa waxay muddooyinkii ugu dambeysay wadeen weeraro abaabulan, oo ay ku qabsanayan xeryaha Ciidanka Amisom ku leeyihiin Gobolada Koonfurta & Bartamaha Somaliya. Taasi ayaana loo maleynaya inay salka ku hayso ka soo bixistooda Goofgaduud.
Ciidanka Xoogga Dalka iyo Amisom oo isaga soo baxay Deegaanka Goofgaduud & Shabaab oo la wareegay
Ciidanka Xoogga Dalka oo ay wehlinayan Ciidanka Nabad Ilaalinta Midowga Afrika,ayaa waxay saacadihii dambe ee Axadii isaga soo baxeen Deegaanka Goofgaduud, oo 26-km u jirta Magaalada Baydhabo.