Korneyl Cabdullaahi Cali Macow ayaa sheegay inay tani calaamad u tahay inaanay meeshaasi waxba ka soo naaso cadayn, haddii dhacdadaasi ahayd mid ka yaabisay shacabka Soomaaliyeed, loona wakiishay guddi aan madaxbannaaneyn.

      "Dadka iyagii baaritaanka lagu samayn lahaa, haddii loo dhiibay inay iyaga noqdaan dadkii baari lahaa, taasna waxaa weeye waxba kama soo socdaan, maxaa yeelay fashilkii iyo ceebihii meesha ka dhacay, dadka Soomaaliyeed-na ka yaabiyay inay argagixisada ka dagaalanto gudaha Xabsiga Dhexe, in iyaga baara la yiraahdo.” Ayuu yiri Korneyl Cabdullaahi Cali Macow

            Dhanka kale Sii Hayaha Wasiirka Cadaaladda Somaliya, Xasan Xuseen Xaaji ayaa sheegay in si dhab ah loo baari doono weerarka dadka badani ku dhinteen ee gelinkii dambe ee Isniintii ka dhacay xabsiga ugu weyn Magaalada Muqdisho. Wasiirka oo xubin ka ah guddiga heer qaran ee loo igmaday inay baaritaan ku soo sameeyan wixii dhacay ayaa sheegay in sharciga la horkeeni doono cid kasta oo u fududeysay inay maxaabiista hub hellaan, dagaal-na ka galaan Xabsiga Dhexe ee Xamar. Isagoo la hadlayay Warbaahinta Dowladda ayuu sheegay inuu bilowday baaritaanka la xiriira dhacdadaasi, isla-markaana ay rajeynayan in guul ugu soo idlaato baaritaankaasi.

         Maleeshiyaad ka tirsan Ururka Al Shabaab oo maxaabiis ahaa ayay markii ugu horeysay u suurtagashay inay hub kaga dhex dagaalamaan mid ka mid ah xabsiyada loogu ilaalada badan yahay ee dalka.

          Cabdikhani Maxamed Khadar, Afhayeenka Ciidanka Asluubta oo la hadlay Warbaahinta Qaranka ayaa Talaadadii sheegay in iska horimaadkaasi ku dhimatay 19 qof, oo 15 ka mida ahaayeen maxaabiista, halka 4-ta kalana ka tirsaneyd askarta.

xIGASHO:DHACDO.COM