Wax ka bedelka Xeerka Bangiga Dhexe ayaa la sheegay inuu yahay qodobka ugu muhiimsan ee kulanka maadaama, iyadoo ay maalmihii la soo dhaafay soo xoogeysaneysay warar sheegaya in Guddoomiyaha Bankiga Dhexe loo wado inuu noqdo shaqsi Ajnabi ah.

Xukuumadda iyo Madaxtooyada ayaa si isku mid ah u waday galaangalka ku aadan in shaqsi Ajnabi ah loo magacaabo Guddoomiyaha Bangiga Dhexe, waxaana sanadkii hore xilka Bangiga Dhexe lagu xayeysiisay Wargeys caan ah oo ka faaloota arrimaha dhaqaalaha.

Aqoonyahano Soomaaliyeed iyo qeybaha kala duwan ee bulshada ayaa walaac ka muujiyay tallaabada la doonayo in Bankiga Dhexe loogu magacaabo Shaqsi Ajnabi ah.

Go’aanka Baarlamaanka ee la xiriira wax ka bedelka xeerka Bangiga Dhexe ayaa si aad ah isha loogu hayaa, waxaana haddii wax laga bedelo qodobka dhigaya in aanu Ajnabi xil ka qaban karin Bangiga Dhexe ayaa waxay noqoneysa mid xalaaleysa in nin Ajnabi ah uu Guddoomiye ka noqon doono Bangiga Dhexe.