Wasiirka Arrimaha Dibadda Imaaraadka Carabta ayaa sheegay in Iiraan ay wado kicin, isla markaana ay dooneyso in dalalka Carabta ka abuurto fowdo, qalalaaso iyo mad-habkeeda shiicada.

Go’aan ka soo baxay Wasiiradda Arrimaha Dibadda Jaamacadda Carabta ayaa lagu sheegay in weerarkii Safaaradda Sacuudiga iyo dhismaha Qunsuliyada uu ahaa mid ay soo abaabushay Iiraan, isla markaana jebisay xeerarka caalamiga ah.

Baaritaanka lagu sameeyay weerarkaas ayaa lagu wadaa in Jaamacadda Carabta u gudbiso Golaha ammaanka ee Qaramada Midoobey, si go’aan uga qaato.

Qaar ka mid ah dalalka Carabta ayaa xiriirka u jaray dowladda Iiraan, iyagoo taageeraya dowladda Sacuudiga, waxaana loo arkaa tani mid Iiraan lagu cunaqabateynayo, iyadoo Sacuudigana uu wado dadaal uu taageero uga raadsanayo dalalka Islaamka.

Xiriirka Sacuudiga iyo Iiraan ayaa sii xumaanayay, wixii ka dambeeyay markii Sacuudiga dil ku fuliyay wadaad Shiico ahaa, waxaana dibad baxyo ka dhashay dilkaas oo ka dhacay Iiraan ay sababtay in dad careysan ay gubaan Safaaradda Sacuudiga ee Tehran.