Narso Daahir oo la dhalatay gabadha la dilay kana mid aheyd qoyska maanta la kulmay madaxweynaha ayaa waxa ay sheegtay in Farmaajo uu si wanaagsan u soo dhaweeyay, sidoo kalena u sheegay inay heli doonaan cadaalad deg deg ah.

Waxa ay sheegtay in ilaa hadda aanan loo balan qaadin magdhaw la siinayo ehelkooda, maadaama askariga dilay gabadha uu ka tirsan yahay dowladda federaalka Soomaaliya, islamarkaana si xaqdaro ah loo dilay Deeqo Daahir.

"Madaxweynaha wuu na soo dhaweeyay, ninkii wax dilay waala soo xiray, madaxweynaha wuxuu noo balan qaaday in si deg deg ah aan cadaalad u heli doono, hada ma jirto magdhaw na loo balan qaaday, waxaan u mahadcelinayaa shacabka Soomaaliyeed ee arrintan ka dhiidhiyay”. Ayay tiri Nasro Daahir.

Inta badan ma dhacdo in cadaalada la horkeeno ciidanka dilalka bareerka ah u geysta shacabka Soomaaliyeed, balse soo qabashada askariga dilay gabadha ayaa waxa ay ka dambeysay kadib markii shacabka Soomaaliyeed ee ku kala dhaqan dal iyo dibad ay si isku mid ah uga dhiidhiyeen.