Kulanka: Watford v Man City Garoonka:Vicarage Road Stadium Waqtiga: 8:30pm Saacada Geeska Afrika Garsoore: Martin Atkinson

Miyay Man City mar kale iyadoo uu ka maqan yahay Vincent Kompany celin kartaa gooldhaliyaha Nigeria Odion Ighalo sidii ay ku sameeyeen Jamie Vardy kulankii Leicester?

Xiddiga reer Nigeria ayaa ah ciyaaryahankii ugu horeysay ee Watford ee shabaqa soo taabta lix kulan oo isku xigta oo Premier League, waxaana uu ahaa ciyaaryahankii ugu goolasha badnaa afarta heer ee kala duwan ee horyaalada Ingariiska ee sannadii la soo dhaafay ee 2015.

Awoodiisa aan caadiga aheyd ayaa u sahashay inuu gool ka dhaliyo Tottenham isniintii. Daafacyada buuxinaya booska Kompany awood ma u lahaan doonaan inay celiyaan xiddigaan?

Watford shaqo fiican ayay qabteen ilaa iyo haatan. Waxa ay si sahlan ugu dhameysan karaan 10ka kooxood ee ugu sareeya.

Laakiin haddii qaab ciyaareedka liita ee Man City ee marka ay martida yihiin uu sii socdo, iyagoo dhumiyay 15 ka mid ah 18 dhibcood oo ay safreen, kuma dhameysan doonaan labo kaalin ee ugu sareysa.

MAXAA KA CUSUB?

Watford ayaa waxaa ka maqan Nathan Ake, kaasoo ay u bilaabaneyso ganaax seddex kulan ah.

Kooxda Hornets lagu naaneeso ayaan qabin wax dhaawacyo cusub ah laakiin daafacyada Tommie Hoban iyo Joel Ekstrand ayaa weli ku kala maqan dhaawacyo gumaarka iyo jilibka ah.

Labada xiddig ee Manchester City Fabian Delph iyo Gael Clichy ayaa soo laabtay ka dib markii ay dhaawacyo yaryar ku seegeen kulankii ay barbaraha la galeen talaadadii kooxda Leicester City.

Fernando ayaa isna diyaar ah ka dib shan kulan uu ku maqnaa dhaawac muruqa ah, laakiin Vincent Kompany ayaa weli dhaawac ku maqan.