Arintan oo ah mid cusub ayaa ka dambeysay kadib weerarkii qaraxyada iyo midka tooska ahaa isugu jiray ee Ururka Al Shabaab, Sabtidii ina dhaaftay ay la eegteen Bar Kontorool oo laga ilaaliyo Madaxtooyada, taasi oo ku dhaw Beerta Nabadda, maalinkaasi oo Madaxweynaha dalka uu uga ambabaxay safarkii Brussels.

Markii hore ma jiri jirin in ciidamada ay fuulaan Dabaqyada ku yaalla agagaarka isgoyska Ceelgaabta, balse waxay xiri jireen wadada ka timaada Dekeda ee marta Ceelgaabta ilaa Madaxtooyada, inta Madaxweynaha uu ka gudbayo halkaasi, dalka haka dhoofo ama dib ha ugu soo laabtee.

Ciidamada ayaa shacabka guryahaasi degan ku amray inay furaan qeybta sare ee guriga, si ay u fuulaan oo ammaanka ay u xaqiijiyaan, iyada oo ciidamadan ay yihiin kuwo aad u feejigan.

Waxaa la arkayay ciidamada oo saaran Dabaqyada oo si miiqab leh u eegaya hareerahooda, sidoo kale isgoysyada qaar wadadan ayaa waxaa lagu jaray gaadiidka dagaalka ee waa weyn, oo horey aanay u dhici jirin.

Shacabka degan guryaha ay ciidamada fuuleen ayaa sheegay inay dareemayaan xaalad amni daro ah, waxayna tilmaameen in lagu beegsan karo, maxaad ciidanka ugu ogolaateen guryihiina.

Dadka falanqeeya arrimaha siyaasadda oo durba arrintan ka hadlay ayaa waxa ay sheegeen in dowladdu ay ceeb ku tahay in weeraro Shabaab ay uga baqaan wadada Madaxweynaha uu maro oo Madaxtooyada aanan ka fogeyn.

XIGASHO:-DHACDO.COM