Intii uu dagaalka socday, 7 qof oo rayid ah ayaa dhimatay markii ay miino la qaraxday gaari caasi ah oo ay ku qaxayeen duleedka Bariire.

Bariire oo ah Tuulo yar oo ay degenyihiin dad beeraley ah ayaa waxaa ay sanadihii ugu dambeeyay saldhig weyn u aheyd Al-Shabaab, oo halkaasi ku lahaa laba maxkamadood oo ay dacwadaha ku qaadaan.

Bishii May ee sanadkaan ayaa waxaa Bariire lagu dilay askari ka tirsanaa ciidamada Marineska Mareykanka, ka dib weerar ay ku qaadeen iyagoo wehliya ciidamada Soomaaliya dhismo ay ku sugnaayeen saraakiil Al-shabaab ka tirsan.

Ma ahan markii ugu horeysay ee ciidamada dowladda iyo kuwa AMISOM ay ka qabsadaan al-Shabaab degaanada ay kaga suganyihiin gobolka Shabeelaha Hoose, dhowr jeer ayey degaanno ay ka mid yihin Janaale iyo Awdhiigle ka qabsadeen Al-shabaab ka dibna ay isaga soo baxeen.