Xaaladda caafimaad ee 7 dhalinyaro ah oo hore xukun dil ah loogu xukumay magaalada Boosaaso ee Gobolka Bari ayaa lagu tilmaamay mid aad u liidata ka dib markii qaar ka mid ah jirdil loo gaystay intii ay ku sugnaayeen goobaha dambi baarista.

Nabaddoon C/qaadir Axmed Xarago oo ah afhayeenka odayaasha dhaqanka ee gobolka Bari oo la hadlay laanta afka Soomaliga ee VOAda ka dib markii uu dhalinyaradaasi xabsiga ku booqday ayaa sheegay in xaaladooda ay aad u liidato islamarkaana lagula kaco falal ka baxsan Bini’aadanimada.

Maxkamada ciidamada qalabka sida ee dowladda Puntland fadhigeeda Bosaso ayaa dhawaan xukun dil ah ku riday 7 dhalinyaro oo ay sheegtay inay ahaayeen dadkii ka dambeeyay dilalkii Bosaso loogu geystay, agaasimihii madaxtooyada Bosaso, taliye ku xigeenkii labaad ee ciidanka booliska iyo xeer ilaaliyiihii maxkamada ciidamada.

Dhalinyarada iyo Xukunkooda ayaa U dhacay Sidan :

1. Nuuradiin Axmed samatar Deerow (dadiisu 20 sano jir)
2. Ayuub yaasin cabdi ( dadiisu 32 sano jir )
3. Cali Ismaaciil cali (Cali gaab) (20 sano jir )
4. Xasan Aadan Xasan Maxamed (dadiisu 22 sano jir )
5. Cabdixakiin Maxamed Aways (dadiisu 24 sano jir )
6. Maxamed Yaasin Cabdi Maxamud (dadiisu 17 sano jir )
7. Daa uud siciid sahal (dadiisu 18 sano jir )